Issittoq
Naalakkersuisut: - Issittumi suleqatigiinneq pingaarutilerujussuuvoq
Naalakkersuisut Arctic Frontiersimut peqataatitaqarsimannginnerat Inatsisartuni aallartitat ippassaq ajuusaarnartuutippaat. Naalakkersuisulli atorfilittamik peqataatitaqarsimanertik erseqqissaatigaat
Ukiumoortumik Arctic Frontiersimik isumasioqatigiinneq ulluni 21. aamma 23. januar Trømsømi ingerlanneqarpoq. Naalakkersuisut Arctic Frontiersimut peqataatitaqarsimannginnera, Nunanut Allanut Sillimaniarnermullu Ataatsimiititaliamit aallartitat ajuusaarnartutut isigaat.
- Nunarput Issittumi qitiulluinnarpoq, Issittumilu ineriartornermut isiginnaartuuginnarata siunnerfilersuinermut peqataasariaqarpugut. Naalakkersuisutigoortumik Nunatta peqataatitaqartannginneratigut, ajuusaarnaraluartumik issittoq pillugu oqallittarnerit nunanit issittup avataaniittunit annertuallaamik sunnersimaneqarnerannut peqataavugut - taamaaliornianngikkaluarluta. Issittumi naalagaaffiit innuttaasullu Issittumi ineriartornermut aqqutissiuussisussaapput, aallartitat oqaatigaat, aallartitat ilaatigut oqaatigineqarpoq.
Atuaruk: Inatsisartunit aallartitat Arctic Frontiersimi peqataapput
Naalakkersuisoq aggersarneqarsimasoq
Naalakkersuisoq Suka K. Frederiksen oqalugiartussatut qaaqquneqarsimangaluarpoq, ajoraluartumilli tamatumunnga taamaatitsiinnartariaqarsimavoq Naalakkersuisut Politikkikkut Ataqatigiissaarineq pillugu Ilulissani januarip 24-anni 25-annilu ataatsimiinnerat pissutigalugu, Naalakkersuisut paasissutissiipput.
- Ukiuni kingullerni Naalakkersuisut atorfilittatigoortumik peqataatitsiuaannarput. Ukioq manna Namminiilivinnermut, Nunanut Allanut Nunalerinermullu Naalakkersuisoqarfik suleqatigalugu Naalakkersuisoq issittumi suliassaqarfimmut attuumassutilik, atorfilittat peqatigalugit peqataapput, Naalakkersuisut oqaatigaat.
Suka ugguartoq
- Ukioq manna Tromsømi Arctic Frontiersimi peqataasinnaannginnera uggornarpoq. Issittumi suleqatigiinneq annertuumik pingaartitaraara, Nunanullu Allanut Naalakkersuisuuffiup tiguneranit sapaatip akunneri marluk qaangiutiinnartut Alaskami Fairbanksimi Issittumi Siunnersuisooqatigiit Ministeriisa ataatsimiinneranni peqataallunga, Suka K. Frederiksen oqarpoq.
Nangipporli:
- Nunanut allanut tunngassutilinni atorfilittanit sisamaasunit Issittumi Siunnersuisooqatigiit pillugit marlunnik sullissisoqarpunga. Taakku saniatigut Naalakkersuisoqarfiit assigiinngitsut Issittumi Siunnersuisooqatigiit iluani suleqatigiinni arlalinni peqataatitaqarput. Politikkikkut ingerlatsinerup saniatigut suleqatigiinni taakkunani issittumi suleqatigiinnermi ingerlaasissaq inississorneqartarpoq.
Suliassaqarfik aalajangiisuullunilu pingaarutilik
Issittoq pillugu nunarsuarmioqatigiinni suleqatigiinneq Naalakkersuisunit suliassaqarfittut aalajangiisutut pingaarutilittullu inissisimavoq, Issittumilu Siunnersuisooqatigiit sumiiffinni suleqatigiiffiit pingaarnersaraat. Taamaattumik Naalakkersuisut suliassaqarfimmi tassani taamatullu issittumi ataatsimeersuarnerni annertusisamik suliaqarput.