Naalakkersuisut inatsit tuaviuullugu suliaq atuutsileraat
Naalakkersuisut nalunaarut, ilaatigut Nuummi inuit qulit sinnerlugit katersuunnissaannik inerteqqutitalik tallimanngormat tamanut nalunarutigaat.
Inatsisartut inatsit tuaviuullugu suliaq sapaatip akunnerani matumani pingasunngormat akuersissutigaat, inatsit nappaatinut tunillaassortunut inatsimmik taaneqartartoq tassani nutarterneqarpoq. Inatsit nutartigaq oqartussat coronamik akiuiniarneranni amerlanerusunik piginnaatitsivoq.
Naalakkersuisut tallimanngormat nalunaarut saqqummiuppaat, inatsisip nutaap imaasa ilaat atuutilersimanerarlugit.
Nalunaarummi pineqarput, Nuummi katersuuttarnermut tunngatillugit killilersuutaagallartut inerteqqutaagallartullu, inatsimmut oqaasertaliussat tamarmik Naalakkersuisut nittartagaatigut atuarneqarsinnaapput.
Nalunaarummi ilaatigut innersuussutigineqarpoq paragraf 6, tassani pineqarpoq, tuniluuttoqarsinnaanera pissutigalugu inuit katersuunnissaannut Naalakkersuisut inerteqquteqarsinnaanerat kiisalu pisortat suliffeqarfiinut isernissamut malittarisassanik inerteqqutinilluunniit atuutsitsilersinnaanerat.
- Illup iluani silamilu inuit qulit sinnerlugit peqataaffigisassaannik katerisimaartitsinerit, aaqqissuussat, pisussat il.il. ingerlanneqarnissaat inerteqqutaavoq, nalunaarummi allassimavoq.
Nalunaarut paragraf 12 b-mik tunngaveqarpoq. Paragraffi aqqutigalugu Naalakkersuisut ininut inuussutissarsiortut atugaannut isersinnaanermut inerteqquteqarsinnaapput imaluunniit killilersuisinnaapput.