Naalakkersuisut ikiorneqarnissamik qinnuiginnipput: Danmark katsorsaanermut akileerusuppa?
Peqqissutsimut naalakkersuisup kalaallinut innuttaasunut Danmarkimi katsorsarneqartussanut Danmarkimit akiliussisarnissamik isumaliuteqarnissamut qinnuiginnippoq.
Naalakkersuisut pisortatigoortumik Danmarkimut peqqinnissaqarfimmi ikiorneqarnissamik qinnuiginnittut, marsip naanerani Sermitsiaq.AG-p oqaluttuaraa.
Peqqissutsimut naalakkersuisup Mimi Karlsenip (IA), sumik ikiorneqarnissamik qinnuiginnissimanini maanna saqqummiuppaa.
- Danskit nunamut namminermut peqqissutsimullu ministeriannik, Sophie Løhdemik, pissutsit arlallit oqaluuseriniarlugit ataatsimeeqateqarnikuunera ilumoorpoq, tassani tarnip pissusianik suliassaqarfimmut tunngasut ilaapput, kiisalu nakorsiartut Danmarkimut katsorsartikkiartortakkagut pillugit suleqatigiinnermi isumaliuteqarnissat, Mimi Karlsen Sermitsiaq.AG-mut allagaqarluni akissuteqarpoq, nangillunilu:
- Innuttaasutsinnut peqqinnissaqarfimmit Danmarkimi peqqinnissaqarfimmi neqeroorutinut innersuunneqartartunut aningaasartuutit akiliunneqartarsinnaanersut danskit tungaannit isumaliutigineqassasoq qinnuiginnissutigaara.
Kiffartuussinerup pitsaassusaa qulakkiissagaa
Danmarkimut qinnuiginninneq nunatsinni peqqinnissaqarfiup aaqqissugaaneranik kivitsinissaq siunertaralugu pisoq, Mimi Karlsen nassuiaavoq:
- Aammattaaq peqqinnissaqarfimmi naleqquttumik pitsaassusilimmik kiffartuussinerup qaffasissusaanik qulakkeerinninnermut atorneqarsinnaasunik nukissanik atuisinnaassagatta, aamma siunissami, Mimi Karlsen oqarpoq.
Peqqinnissaqarfik nunatsinni ataavartumik oqallisigineqartarpoq, aamma ukiakkut 2022-mi folketingimut qinersisoqarnerani. Danmarkimi ikiorneqarnissamik aperisoqartariaqartoq, partiit arlallit tassani isumaqarput, naak peqqinnissaqarfik angerlaanneqareeraluartoq, Kalaallit Nunaanniillu akisussaaffigineqartoq.
Allagaatinik takunninnerup uppernarsarpaa
Danmarkimi Sundhedsministerietimit allakkanik takunnikkumanermit takutinneqarpoq, Naalakkersuisut Sundhedsministeriamut 17. februar ukioq manna allagaqarluni saaffiginnissimasoq.
Nunatsinni peqqinnissaqarfik sulisussaqarniarnikkut aamma pitsaassutsimik illersorneqarsinnaasumik attassinissaq atuutsinniarlugu aningaasartuutit qaffakkiartorneranni, ikiorneqarnissamik qinnuiginninneq pisoq, saaffiginnissummi Mimi Karlsen peqqissutsimut ministerimut Sofie Løhdemut (V) allappoq.
Danmarkip katsorsaanermut akiliutit akilertarnissaat akuerippagu, innuttaasut katsorsarneqarnissamik pisariaqartitaat aatsaat naammassineqarsinnaanngippata, Kalaallit Nunaata innuttaasut Danmarkimut katsorsartikkiartortarnissaannik innersuuttassallugit, Mimi Karlsen allappoq.
Nunatsinni peqqinnissaqarfiup qanoq ikiorserneqarsinnaanera misissorneqaleruttortoq, Sundhedsministerietip siornatigut ilisimatitsissutiginikuuaa.