isornartorsiuineq
Naalakkersuisut Henrik Leth maannaannakkut soraarsikkaat
Ukiuni ataatsimi Nunatsinni Naatsorsueqqissaartarfimmi siulersuisuni ilaasortatut sulereerluni inuussutissarsiuteqartoq aningaasaqarnermik naatsorsueqqissaarnermillu ilinniarsimasoq ukiuni pingasuni sulisussaalluni ukioq ataasinnaannaq qaangiuttoq soraarsitaavoq.
Inuussutissarsiornermik ingerlataqartoq Henrik Leth Kalaallit Nunaanni Naatsorsueqqissaartarfiup siulersuisuiniit erngerluni soraarsitaavoq.
Taama uppernarsaavoq siulersuisuni siulittaasoq Vøgg Løwe Nielsen, nassuiaanneqarsimanani imaluunniit Henrik Lethip aningaasaqarnermik immikkullu naatsorsueqqissaarnermik ilisimasaqartup ukiunilu arlaqartuni siulersuisuniisimasup peerneqarnissaanik aalajangiinermi Nalaakkersuisunit akuliutsinneqarsimanani.
Henrik Leth juunimut 2019-imut issiasussatut siulersuisunut toqqarneqarpoq, maannagaarlu taarserneqartussaanngikkaluarluni.
- Tunngaviusumik isumaqarpunga piffissamut aalajangersimasumut toqqagaasimagaanni ingammik naatsorsueqqissaartarfimmut soraarsitsisoqarsinnaanngitsoq nammineq kissaatigisimanngikkaanni, Vøgg Løwe Nielsen oqarpoq.
Siulersuisuni siulittaasup naqissuermagu naalakkersuinikkut siulersuisuni ilaasortani soraarsitsisoqartarnera naatsorsueqqissaartarfimmut ajornartorsiutaasoq, tamatuma peqqutigaa siulersuisut piginnaasanik tunngavigalugit toqqarneqartartut, ilaasortalli imminnut akisussaallutik.
- Oqaluuserissavarput taamatut pisoqarnissaata pinngitsoortinnissaanut inatsisivut ersarinnersut. Isumaqarpunga inatsisip pinngitsoortissinnaasariaqaraa piffissaanngitsukkut tunngasissaqarpiaranilu soraarsitsisoqarsinnaanera. Maannakkut inatsisip tamanna pinngitsoortissinnaanngippagu misissortariaqarparput inatsisillu allanngortinnissaanut siunnersuuteqarluta, Vøgg Løwe Nielsen oqarpoq.
Aningaasaqarnermut akileraartarnermullu Naalakkersuisoqarfimmi pisortap Nikolaj Sten Christensenip soraarsitsineq itisilerusunngilaaq, Naalakkersuisoq IA-meersoq Aqqaluaq B. Egede innersuussutigalugu, taannali AG-mut oqaaseqaateqarsimanngilaq.
Sermitsiaq.AG-p Aqqaluaq B. Egedemik (IA) oqarseqartitsinissani sulissutigaa.
Suliaq pillugu AG-mi paasisaqarnerugit: