Kuannersuarni suliniummut aalajangiinermut missingiussamut ETM-ip aalajangiinissamut missingiummut maannamuugallartoq isummerneranut Naalakkersuisut oqaaseqaatissaqanngillat.

Ingerlatseqatigiiffiup qinnuteqaatini allaanerusoq 16. december 2022 nassiuppaa, tassani uranip niuerutissatut piiarneqassanngitsoq, tailings-itulli inissinneqassasoq siunnersuutigineqarpoq.

Ulloq 27. juli 2023 Naalakkersuisut qinnuteqaat taanna pillugu aalajangiinissaq Greenland Minerals A/S-imut tusarniaassutigalugu nassiuppaa. Missingiutip imaraa uranimut inatsimmi § 1, imm. 2 innersuussutigalugu qinnuteqaat itigartinneqassasoq. Tassani allassimavoq, isumalluut tamarmiusoq agguaqatigiissillugu 100 ppm sinnerlugu uranimik akoqarpat, misissueqqaarneq, aatsitassarsiorluni misissuineq imaluunniit piiaaneq uranimut sammitinneqarani allamut sammitinneqartoq, ingerlateqqusaanngitsoq.

Allagaatinik takunnikkumasoq

Aallaaviatigut aalajangiinissamut missingiummut tusarniaaneq ullunik 14-inik piffissalerneqartussaavoq. Kisianni Greenland Minerals A/S allakkiani missingiummut attuumassuteqartuni allagaatini takunninnissamik qinnuteqarsimammat, allakkiat ujartorneqartut ingerlatseqatigiiffimmit tiguneqareernerisa kingorna ullunut 14-inut tusarniaanermut piffissaliussaq sivitsorneqarpoq.

Aatsitassanut Inatsisillu Atuutsinneqarnerannut Naalakkersuisoqarfiup maannakkorpiaq allagaatinik takunninnissamik qinnuteqaat suliaraa, aammalu allakkiat 2023-mi aggustip qiteqqunnerani nassiussinnaassallugit naatsorsuutigalugu.

Qinnuteqaat allaanerusoq pillugu inaarutaasumik aalajangiineq 2023-mi septembarip qiteqqunnerani naammassissasoq naatsorsuutigineqarpoq.

Aningaasanut, Naligiissitaanermut, Aatsitassanut Inatsisinillu Atuutsitsinermut Naalakkersuisup, Naaja H. Nathanielsenip, ETM-ip aalajangiinissamut missingiummut maannamuugallartoq isummerneranut Naalakkersuisut oqaaseqaatissaqanngitsut uteqqippaa, ingerlatseqatigiiffiullu tusarniaanermut akissutaa utaqqeqqaarniarpaat.