Naalakkersuisut Danmarkimi naalakkersuisunut akissarsiat pillugit apeqqummut isumaqatigiinngissutaasumut 'eqqaasissummik' nassiussaqarput
Naalakkersuisunut ilaasortat marluk Danmarkimi justitsministerimut Peter Hummelgaardimut, Kalaallit Nunaanni pinerlussimasut inissiisarfiini nakkutilliisut akissarsiaat kiisalu politiit atugaat pillugit ernumassuteqarnertik pillugu allagaqarput.
2019-imi ukiuni arlalinni pinerlussimasut inissiisarfiini nakkutilliisut akissarsiaasa qaffanneqarnissaat pillugit oqallittoqareersorlu aaqqiisoqarpoq. Akissarsiat qaffanneqarnerat politikkikkut isumaqatigiissuteqarneq aqqutigalugu pivoq, taassumalu nunatsinni pinerlussimasut inissiisarfiini nakkutilliisut sulisussarsiortarnerannik annertuumik ajornartorsiuteqarnermut aaqqiissutaasussaavoq.
Akissarsiat qaffanneqarnerisa suliassaq aaqqippaa, pinerlussimasut inissiisarfiinullu sulisussanik qulakkeerinnilluni. Isumaqatigiissutillu taassuma aamma politiinut nunatsinni atorfeqartunut akissarsiaqarnerulersitsinermik qulakkeerinnippoq, maannali alla ajornartorsiutaalersinnaavoq.
Akissarsiat qaffanneqarnerannummi isumaqatigiissut aaqqiissutaagallarpoq, 2023-llu naanerani atorunnaartussaavoq. Tassunga atatilluug Naalakkersuisunut ilaasortat marluk justitsministerimut Peter Hummelgaardimut (Soc.) allagaqarput.
Allakkami Naaja H. Nathanielsen (IA) aamma Aqqaluaq B. Egede (IA) ima allapput:
Kajumissuseqarnissaq naatsorsuutigigaat
- Kalaallit Nunaanni pinerlussimasut inissiisarfiini nakkutilliisunut politiinullu akissarsianut tunngatillugu justitsministeriusimasup aaqqiissuteqarnissamut kajumissuseqarnera suli atuuttoq, Naalakkersuisut naatsorsuutigaat.
Allakkami allagaq 2022-mi ukiakkut justitsministeriusimasumut Jeppe Bruusimut (Soc.) tamanna pillugu allagaasimasoq ilanngunneqarpoq.
Pinerlussimasut inissiisarfiini nakkutilliisut akissarsiaasa qaffanneqarnerat peerneqaqqissanngitsoq, 2021-mi justitsministeriusimasup oqarneranut Nathanielseni aamma Egede innersuussipput.
'Naalagaaffimmi oqartussat iluanni sulianut assigiinnut assigiimmik akissarsiaqarnermik kinguneqartariaqartoq, aamma politiit nunatsinni atukkat ajornakusoortut akissarsiatigut naleqquttariaqartut', Naalakkersuisunut ilaasortat politiinut tunngatillugu taama allapput.
Kattuffimmi siulittaasoq: Aaqqiissuteqartoqarnissaanut kimigiiserpugut
Pinerlussimasunut inissiisarfimmi nakkutilliisut Fængselsforbundetimut ilaasortaapput, kattuffillu sapaatip akunneranut suliaq pillugu suliniuteqartartoq, siulittaasoq Bo Yde Sørensen Sermitsiaq.AG-mut oqarpoq:
- Piffissamut ungasinnerusumut matumani aaqqiissuteqartariaqarpugut, partiillu naalakkersuisuutitaqartunik aallartitaannillu – pingaartumik inatsiseqarnermut oqaaseqartartuinik ataavartumik ataatsimeeqateqartarpunga, Bo Yde Sørensen oqarpoq.
Oqaaseqartartut aaqqiissuteqartoqarnissaa pillugu pitsaasunik oqariartuuteqartartut, taanna oqaluttuarpoq, kisianni aalajangersimasumik isumaqatigiissuteqartoqarneranik suli kinguneqanngilaq.
- Isumaqatissarsiornikkut sapinngisarput tamaat suliniuteqarpugut, Bo Yde Sørensen oqarpoq.
Danmarkimi Pinerluttunut Isumaginnittoqarfimmi sulisut sulisoqarnikkut tatineqaqisut, taanna nangilluni oqarpoq. Taamaattumillu taassuma naliliinera naapertorlugu, Danmarkimit Kalaallit Nunaannut inissiisarfinni amigaateqarneq pissutigalugu nakkutilliisunik aallartitsisoqaqqittalissappat ajussanerarpaa:
- Naak Kalaallit Nunaat kusanaraluartoq, uagut parnaarussivinni nakkutilliisut pisariaqartippagut. Taamanikkut pisinnaasimanngilagut, ullumikkut pisinnaanngilluinnarpugut, Bo Yde Sørensen oqarpoq.