Skip to main content

Naalakkersuisut coronapassimik atuutsitsilersut

Katersuussinnaasut amerlassuseqarnissaannut killilersuutit qanermullu assiaquteqarnissamik piumasaqaat nunami sumiiffinni amerlanerusuni juulip 31-ani atorunnaassapput. Neriniartarfinnili neriniaraanni aaqqissuussanulluunniit allanut peqataaniaraanni akiuussutissalertissimanermut uppernarsaateqarnissaq atuutsinneqalerpoq.

Coronamut atatillugu killilersuutit innuttaasorpassuarnut juuli 31-ani atorunnaarsinneqassapput, matumanilu pineqarlutik qanermut assiaquteqarnissamik piumasaqaateqarneq illullu iluani silamilu katersuunnermi inuit amerlanerpaamik 20-usarnissaannik piumasaqaateqarneq.

Upernavimmili Upernaviullu nunaqarfiini aamma Aasianni innuttaasut killilersuutinik aallaqqaammut aggustip qulingata tungaanut atuutsikkallarneqassapput. Sumiiffinni allani aqunneqarsinnaanngitsumik tuniluuttoqalissagaluarpat killilersuutit aamma atuutsinneqaqqilersinnaapput, Múte B. Egede oqarpoq. 

Akiuussutissalertissimanngitsunut killilersuutit suli atuutsinneqassapput, killilersuutillu ilaat sukateriffigineqassallutik.

Naalakkersuisut pingasunngornermi tusagassiortunik katersortitsigamik taamatut ilisimatitsissuteqarput.

Upernavik nunaqarfiilu aamma Aasiat:

Tasiusaq

Upernavik Kujalleq

Nutaarmiut

Nuussuaq

Innaersuit

Naajaat

Aappilattoq

Kangersuatsiaq

Kullorsuaq

Sumiiffinnit pineqartunit, tamakkiisumik akiuussutissalertissimagaanni taamaallaat ullumikkumiit aallartoqarsinnaalerpoq, aamma kikkut tamarmik ilaaffigisinnaasaannik angalaniaraanni, soorlu illoqarfinni bussinut, timmisartunut umiarsuarnullu ilaaniaraanni akiuussutissalertissimanissaq imaluunniit coronamik tunillatsissimannginnermut uppernsarsaateqarnissaq (nal.ak. 48-nik pisoqaassuseqartoq) piumasaqaataalerpoq.

Múte B. Egedep sakkortunerpaamik kaammattuutigaa, aqunneqarsinnaanngitsumik tuniluuttoqartillugu nunaqarfiit akornanni pisariaqanngitsumik angalasoqassanngitsoq. 

Coronapassi atuutsinneqalersoq

Nunap annersaani killilersuutit juulip 31-ani atorunnaarsinneqarpata, cafeeni, imerniartarfinni neriniartarfinniluunniit inuit allat akornanniinniaraani kiisalu aaqqissuussanut assigiinngitsunut peqataaniaraanni akiuussutissalertissimanissamut uppernarsaateqarnissaq piumasaqaataalissaaq.

Tassa inuit akiuussutissalertissimanngitsut suli killilersuiffigineqassapput.

Uppernarsaat coronapassiusinnaavoq, taanna Sullissivik aqqutigalugu qinnutigineqarsinnaavoq. Tamatuma saniatigut allagartaq akiuussutissalerneqarnermi tunniunneqartoq uppernarsaatitut atorneqarsinnaavoq.

Akiuussutissalertissimanermut uppernarsaateqarnissamik piumasaqaatip qaqugu atorunnaarsinneqarnissaa suli ullulerneqanngilaq.

Múte B. Egedep tusagassiortunik katersortitsinermi erseqqissaassutigaa, inuit tamakkiisumik akiuussutissalertissimasut akiuussutissalerneqarsimanngitsunut sanilliullutik tunillatsissinnaanerat annikitsuaraasoq, aamma tunillaasinnaanerat annikitsuaraasoq. 

Aasianni meeqqerivik matuneqarsimasoq

Aasianni meeqqerivik Kulloq tunillatsissimasinnaasunik ujaasisoqarneranut atatillugu ullumimiit matuneqarpoq, tunillatsissimasut tunillatsissimanertik suli paasisimanagu meeqqerivimmiissimammata. Meeqqat sulisullu angerlartinneqarsimapput, ullunilu arfineq-malunni mattussimareernerminni misissortissallutik, Nunatta Nakorsaaneqarfiani nakorsaq Paneeraq Noahsen ilisimatitsivoq.

Akiuussutissalersuineq

Meeqqat mikinerusut qaqugu akiuussutissalertinnissamut neqeroorfigineqarnissaat pillugu suli aalajangiisoqarsimanngilaq. Naartusut milutsitsisullu akiuussutissalertinnissaannut maannakkorpiaq neqerooruteqartoqarpoq, soorlu aamma inuusuttut 16-inik 17-inillu ukiullit akiuussutissalersuinermi pilersaarummut ilanngunneqarsimasut. 

Naalakkersuisut nunami tamarmi ingerlaavartumik akiuussutissalersuisoqarnissaa sulissutigaat. Aqangu sisamanngornermi Nuummi akiuussutissalersuisoqaqqissaaq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER