Naalakkersuisut avataanit sulisussanik tikisitsisinnaaneq ukiortaareerpat ammaanniaraat

Suliffeqarfiit, paaqqinnittarfiit napparsimmaviillu avataanit sulisussarsiorsinnaanerat ajornannginnerusariaqarpoq, Aatsitassanut Suliffeqarnermullu Naalakkersuisoq Erik Jensen (S) oqarpoq

Aalisartut, napparsimmaviit, utoqqaat illui paaqqinnittarfiillu sulisussaaleqipput. Ukiortaareerpat ajornannginnerulissaaq avataanit sulisussanik tikisitsisinnaaneq.

Aatsitassanut Suliffeqarnermullu Naalakkersuisoq Erik Jensen (S) Sermitsiaq.AG-mut taamatut oqarpoq.

Ullumikkut malittarisassat oqimaappallaarlutillu allaffissortitsivallaarput, aamma sulisinnaanermut najugaqarsinnaanermulu akuersissutinik pissarsiniartarneq qaammatit pingasut arfinillillu akornanni sivisussuseqarsinnaasarpoq. Erik Jensenip Danmarkimi Udlændinge- og Integrationsministeri Mathias Tesfaye (Soc) peqatigalugu Kalaallit Nunaannut qinnuteqartartut sukkanerusumik sullinneqartarnissaat inissinniarpaa.

- Sulisitsisut ajornannginnerumik, sukkanerusumik oqinnerusumillu avataanit sulisussanik Kalaallit Nunaannut tikisitsisinnaasariaqarput.

Savalimmiut taamatut sukkasuumik aaqqissuussisareerput, tassa suliffeqarfiit aningaasarsiatigut isumaqatigiissutitigullu ajunngitsumik atugassaqartitsigaangamik siumoortumik akuersissummik tunineqarsinnaapput. Tassanittaaq piumasaqaataavoq Savalimmiuni suliffissaaleqisoqannginnissaa. Tamatuma kingorna qinnuteqaat sapaatip akunnialuit ingerlaneranni suliarineqarsinnaalertarpoq. Aaqqissuussaq taamatut ittoq Erik Jensenip Mathias tesfayellu maanna suliariniarpaat.

Powered by Labrador CMS