Naalakkersuisut Ataatsimiititaliamut akuersiinnartut

Inatsisartut ullumi Naalakkersuisunut peqqusipput, Naalagaaffeqatigiinnermi oqartussanut saaffiginnillutik Kalaallit Nunaanni unnerluussisussaatitaasunut piumasarissagaat, kinguaassiuutitigut meeqqanik atornerluisoqarsimatillugu pineqaatissiisarnerup sakkortusineqarnissaa.

Naalakkersuisut allannguutissatut siunnersuuteqarsimagaluarput, tassani aamma pinerluuteqarsimanerit allat, soorlu toqutsisoqarsimatillugu sakkortunerusumik pineqaatissiisoqartalernissaa anguniarlugu.

Allannguutissatulli siunnersuut itigartinneqarpoq, aallaqqaammullu Sofia Geislerip (IA) siunnersuutigisimasaa tamanit akuerineqarluni.

- Pissangalaarama sajulaarpunga. Sulialli malinnaaffiginissaanut qilanaarpunga, Sofia Geisler Inatsiartut oqaluttarfianni oqarpoq.

Abelsen: Suliaq ingerlavoq

Inatsisinik Atuutsitsinermut Naalakkerusisup Martha Abelsenip (S) oqaluttarfimmitoqaatigaa, Naalakkersuisut siunnersuummut tamakkiisumik isumaqataasut. Martha Abelsenilli neriuutigisimagaluarpaa, pinerluutini allani arlalinni pineqaatissiisarnerup sakkortusineqarnissaanut Inatsisartut isumaqataassasut.

Naalakkersuisut siunnersuummut massakkut taperserneqanngikkaluartut, suliaq ingerlavoq, Martha Abelsen oqaluttuarpoq:

- Naalakkersuisut pinerluttulerinermi inatsimmi § 147-mi pineqaatissiinissamut killissarititaasup sakkortusineqarnissaa pillugu inatsisinik atuutsitsinermut ministerip isumaqatiginninniaqatigineqarnera ingerlatiinnarpaat, tassa pinerliinnerit sakkortuut ulluminut sanillullugu sakkortunerusumik pineqaatissiissutaasalernissaat anguniarlugu. Allannguutissatut siunnersuut taamatut ittoq tiguneqarpat, Inatsisartunut saqqummiunneqassaaq, Martha Abelsen oqarpoq.