Naalakkersuisut aningaasanut inatsisissatut siunnersuutertik siulleq saqqummiuppaat

Naalakkersuisunngorlaat aningaasanut inatsisissatut siunnersuut siulleq piareersimavaat, 2022-mi 31 millioner koruuninik sinneqartooruteqarnissaq anguniarneqarpoq.

Aningaasasqarnermut Naalakkersuisup Asii Chemnitz Narupip (IA) 2022-mut aningaasanut inatsisisatut siunnersuut sisamanngornermi ualikkut saqqummiuppaa.

Siunnersuut Naalakkersuisunngorlaat siunnersuutaasa siullersaraat, qulequtsiunneqarsimavorlu 'Naligiinnerujartorneq'. Asii Chemnitz Narupillu siusinnerusukkut allagaqarnermini oqaatiginikuuaa, upernaaq pissaaneq allanit tiguneqaraluartoq, nunap aningaasaqarnerani annertuumik allannguisoqarnissaa innuttaasunit naatsorsuutigineqassanngitsoq. Asii Chemnitz Narupip aallarniutigalugu oqaatigaa, susassaqarfiit ilaat aappaagu aningaasanut inatsimmi amerlanerusunik aningaasaliiffigineqarnissaat salliutinneqassasoq. Tassani pineqarlutik peqqinnissaq, utoqqaat, meeqqat inuusuttullu kiisalu kulturi.

-Nunap aningaasaqarneranut atatillugu anguniarneqarpoq, piffissaq ungasinnerusoq eqqarsaatigalugu inuiaqatigiinni naligiinnerusoqalernissaa, taanna oqarpoq.

Utoqqaat aningaasaliiffigineqarnerunissaat qulakkeerneqassasoq

Naalakkersuisup erseqqissaassutigaa, nunap aningaasaqarnera patajaattuusoq, maannakkorpiarlu pitsaasuusutut oqaatigineqarsinnaasoq. Ukioq 2020 coronap ajornerpaasumik atugaqartitsinerani siuarialaartoqarsimavoq, ukiorlu manna siuariaqqinniartutut isikkoqarluni.

Kisianneqarporli:

- Atugarissaartuunitsinni ajornartorsiuteqarpugut. Ukiorpassuarni pisortat aningaasartuutigisartagaat amerliartorsimapput, nunatta karsiata aningaasartuutigisartagaasa amerliartorneranni. Utoqqaat amerlanerulertussaapput, taakku ajunngitsumik atuganissaat qulakkeerniarlugu amerlanerusunik aningaasaliisoqartariaqarpoq, Naalakkersuisoq oqarpoq.

Kisitsisit pingaarnerit qimerluualaaraanni takuneqarsinnaavoq, 2022-mi 31 millioner koruuninik sinneqartoortoqalaarniartoq, ukiunilu sisamani tulliuttuni 132 millioner koruuninik katillugit sinneqartoortoqarniartoq.

Takussutisami 2025-p tungaanut missingersuutit takuneqarsinnaapput, tassani IS-imi angusat immikkut maluginiagassaallutik:

Naalakkersuisut siunnersuummi erseqqissaassutigaat, Innuttaasut agguataarsimanerisa ineriartornerat tunngavigalugu ukiuni aggersuni aningaasanut inatsisit ”kusanartunik” sinneqartoorfiussasut. Utoqqaat amerliartuinnartussaapput, tamatumalu pisortat aningaasaqarnerannik tatisinissaa naatsorsuutigineqarpoq, Naalakkersuisullu tamatumannga isumaginnissinnaanissaat kissaatigineqarpoq.

Naligiinnerulertoqarnissaa qulakkeerniarlugu Naalakkersuisut aalajangersimapput, imminut ataqatigiissumik akileraartarnermik aaqqissuusseqqittoqassasoq, aaqqissuusseqqinnerli aningaasanut inatsisissamut matumunnga sunniuteqassanngilaq.

Naalakkersuisut siunnersuutigaam aningaasat annertuallaanngitsut allanut nuunneqaassasut. Tamanna takussutissami tulliuttumi takuneqarsinnaavoq:

Naalakkersuisut siunnersuutaasa tigussaat ilagaat 15 millioner koruunit utoqqarnut aningaasaliissutigineqassasut. Aningaasat taakku suliniutinut nutaanut immikkoortitanit aaneqassapput. 2023-miit aningaasaliissutit ukiumut 30 millioner koruuniusassapput. Utoqqarnik sullissinerup aaqqissuuteqqinneqarneranut taakku aningaasaliissutigineqassapput.

Naalakkersuisut aamma siunnersuutigaat, inuit pisinnaatitaaffiinik sullissiviit kultureqarnerlu amerlanerusunik aningaasaliiffigineqassasut.

Suliniutit akissaqartinniarlugit Naalakkersuisut siunnersuutigaat, ingerlatsinermi tapiissuteqartarnerilu kontut ukiumut 25 millioner koruuninik sipaarfiusassasut.

- Sipaarutit suliassaqarfinni assigiinngitsuni aningaasartuutitigut tatineqarneq isiginiarlugu agguataarneqarput. Taamaalilluni peqqissutsimut suliassaqarfimmi ingerlatsinermut kontut napparsimasunut sammitinneqartut sipaarutissanut ilaatinneqanngiivipput, siunnersuummi allassimavoq.

Powered by Labrador CMS