Naalakkersuisut allagaatit tamaasa ataatsimiititaliamut tunniutissavaat
Nipisattassiissutit pillugit oqaluuserinninnermi unikkallatsiareernerup kingorna Inatsisartuni siulittaasoqarfiup erseqqissarpaa Naalakkersuisut allagaatinik, Kim Kielsenip nipisattassiinermi attuumassuteqarpallaarneranut tunngasunik tamanik tunniussaqassasut.
Kukkunersiuinermut ataatsimiititaliap nipisattassiinermut tunngatillugu misissuinerminnit nalunaarusiaat akunnerpassuarni oqallisigineqareersorlu, Hans Enoksen oqaluttarfimmut qaqimmat, unipiloorpoq.
Oqaaseqaatissani atuarnagu taassuma piumasaraa Inatsisartuni siulittaasoqarfiup Naalakkersuisut peqqussagai nipisattassiinermut tunngatillugu allagaatit tamaasa tunniunneqarnissaanik.
Kukkunersiuinermut ataatsimiititaliap nalunaarusiamini Naalakkersuisut isornartorsiorpai nalunaarusiap suliarinerani paasissutissanik amigartunik ataatsimiititaliamut tunniussisimanera pillugu.
Enoksen Siulittaasoqarfimmut piumasaqareersorlu akunneq ataaseq unikkallartoqarpoq, siulittaasoqarfillu ima inerniliussaqarpoq:
- Siullermik kukkunersiuinermut ataatsimiititaliaq atortussanik sulinermini pisariaqartitaminik pissarsisussaatitaasoq, siulittaasoqarfimmit naqissuserneqarpoq.
- Aappaattut suliassaqarfimmi inatsisit atuuttut naapertuuttut siulittaasoqarfimmit isumaqarfigineqarput.
- Pingajuattullu siulittaasoqarfilli oqallinneq tunngavigalugu inatsimmik ersarissaalluni suliaqarnermik aallartitsiniarpoq.
Tamassuma kingorna oqallinneq ingerlaqqitsiarpoq, naak oqallinneq unitsillugu paasissutissat tamaasa ataatsimiititaliamut tunniunneqaqqaarnissaat Hans Enoksenip piumasarigaluaraa.
Siverth K. Heilmannip (A) oqallinneq unitsillugu paasissutissanik naammattunik peqqaarnissaq aamma taperserpaa.
Akunnerit tallimat oqallittoqareersorlu Kim Kielsen inersuarmi oqaaseqassalluni toortakkamik toorsivoq.
Taassuma oqaatigaa siulittaasoqarfimmit 5. august allakkat tiguneqarsimasut, allagaatinik tamanik tunniussinissamik piumasaqarnermik imaqartut. Allagaq akissallugu kissaatigisimavaa, inatsisilerituulli isumaqatigiinnginnerat pissutigalugu piumasaqaat suli akineqarsimanngilaq.
- Siulittaasoqarfimmut isumaqatiginninniassalluta piareersimavugut, inatsisilerituulli isumaqatigiinnginnerat Naalakkersuisunut tussanngilaq, Kim Kielsen oqarpoq.