- Illoqarfinni nunaqarfinnilu avatangiisitigut eqqakkatigullu isumaginninneq pitsaasumik aaqqiivigisarumallugu Naalakkersuisut sulipput.

Naalakkersuisut siulittaasuat Kim Kielsen Inatsisartut ammaanersiornerani oqalugiarnermini ilaatigut taama oqarpoq.

Avatangiisinut akitsuut
Innuttaasunut, kommuninut suliffeqarfinnullu piumasaqaatit sukannernerulersinniarlugit politikkikkut suliniuteqarnissaq pisariaqartoq, taassuma erseqqissaatigaa.

- Naalakkersuisut maanna misissorpaat avatangiisinut mingutsitsissutaasinnaasunik akitsuusersuinissaq, taamaaliornikkut eqqakkanik isumaginninnerneq pitsaanerulersikkumallugu, Kim Kielsen oqarpoq.

-  Atuisoq, suliffeqarfik pisortalluunniit suliffeqarfiutaat avatangiisinik sunniiguni aamma akiliisariaqassaaq mingutsitsissutaasut piiarnissaannut tamatta akisussaaffeqaratta. Avatangiisinut aningaasaateqarfimmik pilersitsilersaarpugut, aningaasat taakku atorlugit avatangiisitta eqqiluitsuunissaanut suliniarnerput malunnaateqarluartumik pitsanngortikkumallugu, taanna oqarpoq.