Naalakkersuisut Aalisarneq pillugu Ataatsimiititaliarsuup sulinissaanut tunngavigineqartussaq akuersissutigaat

- Nuannaarutigaara Naalakkersuisut Aalisarneq pillugu Ataatsimiititaliarsuup sulinissaanut tunngavigineqartussaq ullumi akuersissutigimmassuk. Aalisarneq pillugu Ataatsimiititaliarsuup sulinermini pingaarutilippassuit qulaajartussaavai, aalisarneq pillugu Inatsisartut inatsisaata allanngortinnissaanut tunngavigineqartussaallutik.

Aalisarnermut naalakkersuisoq Nikkulaat Jeremiassen Namminersorlutik Oqartussanit tusagassiutinut nalunaarummi oqarpoq.

Ataatsimiititaliarsuup sulinermini ilaatigut suliniutaasinnaasoq ataaseq arlallilluunniit anguniakkap angunissaanut tapersiisinnaasut naleqqussusiat misissoqqissaassavai nalilersorlugillu:

• Pisuussutinik atuinermut sinaakkutinik aqutsineq
• Piginnittuunermi pisassiissutillu pillugit pissutsit kiisalu aningaasaliissuteqartitsisinnaaneq
• Unammilleqatigiinnissamik qulakkeerinninneq aalisarnermilu piginnittuunermik annertunerusumik siammaasinnaaneq
• Aalisakkanik pisuussutinik atuinermi annertunerusumik naleqalersitsineruneq
• Siunnersuutit ataatsimiititaliarsuarmit suliarineqartut aningaasatigut allaffissornikkullu kingunissaat

- Neriuppunga Aalisarneq pillugu Ataatsimiititaliarsuarmi ilaasortat suliaminnut tunniusimallutillu tapersersuillutik suleqataajumaartut, inatsit allaqqunneqarsinnaanngitsumik siunissami ukiorparujussuarni atuuttussaammat, Nikkulaat Jeremiassen oqarpoq.

Aalisarneq pillugu Ataatsimiititaliarsuarmut eqqartuussissuserisoq Jens Paulsen siulittaasussattut Naalakkersuisunit toqqarneqarpoq.