Skip to main content

Naalakkersuisut Aalisarneq pillugu Ataatsimiititaliarsuarmut akerliusumik suliaqartut

Naalakkersuisut inuttaqarnermut tunngatillugu nalunaarutissaq arlalitsigut nalinginnaanngitsoq tupaallatsitsillutik tusarniaassutigalugu nassiussimavaat. Nalunaarummi malittarisassat siusinnerpaamik ukiut tallimat qaangiuppata atuutsinneqalertussaapput, taamaalilluni Aalisarneq pillugu Ataatsimiititaliarsuup suliai utaqqerusunneqarsimanngillat.

 Naalakkersuisut Aalisarneq pillugu Ataatsimiititaliarsuaq, aalisarnermik inuussutissarsiuteqartut, sulisut kattuffii politikkikkullu partiit isumaqatigiissutigisimasaat malillugit siunissami nungusaataanngitsumillu aalisarnermik ingerlatsinermi malittarisassat inissinniarlugit maanna ulapputeqartoq, avaqqutiinnarlugu iliuuseqarniarpasipput.

Kilisaassuit kalaallinik qassinik inuttaqartassanersut ukiuni kingullerni arlaleriarluni oqallisaassarsimavoq. Naalakkersuisuusarsimasut maannamut arlaqartut qulakkeerusuttarsimavaat, kilisaatit kalaaliinnarnik inuttaqartarnissaat.

Ajornartorsiutaaginnarpoq, atorfippassuarnik taakkuninnga inuttaliinissamut kalaallit ilinniarsimasut naammannginneri, taamaammat nunanit allanit sulisussat tikisinneqarnissaat pisariaqartarsimalluni.

Tupaallatsitsineq

Taamaammat aalisarnermik inuussutissarsiuteqartut tupaallaatigisimavaat, inuttaqarnissamut malittarisassat, inuttat 90 procetii kalaaliunissaannik aalajangersaasut, pillugit nalunaarut Naalakkersuisut tusarniaassutigalugu nassiussipallassimanerat. Nalunaarutilli aatsaat siusinnerpaamik ukiut tallimat qaangiuppata atuutsinneqalertusaammat tusarniaaneq nangaanartoqartinneqarpoq.

Sulisitsisut tusarniaanermut akissutertik Aalisarnermut Naalakkersuisoqarfimmut nassiuteqammerpaat, kattuffillu imatut allappoq:

- Siunnersuut tupaallannarpoq, Aalisarnerlu pillugu Ataatsimiititaliarsuarmut suliakkiissutissatut aalajangiunneqarsimasut suli atuunnersut apeqqutigerusunnarluni imaluunniit ataatsimiititaliarsuup suliassaasa ilaat peerneqarsimanersut, tassunga ilanngullugu aalisarnermi kalaallinik amerlanerusunik inuttaqarnissaut tunngasoq peerneqarsimanersoq apeqqutigerusunnarpoq, Bent Sørensen Sulisitsisut sinnerlugit tusarniaanermut akissuteqarnermini allappoq.

Ernumanartoq

- Nalunaarut aqqutigalugu inatsisiliorniarneq assut ernumanarpoq, tassami sammisaq pineqartoq ataatsimiititaliami Naalakkersuisut peqqusinerat malillugu suliarineqarmat, tamatumunngalu peqatigitillugu nalunaarutissatut siunnersuusiortoqarpoq piffissami qanittumi allannguisoqartariaqarnermik kinguneqartussamik, tassa kalaallit inuttat amerlanerulersimanersut uppernarsaatissaqartinnagu. 

- Siunnersuut qaqutigoorluinnartumik malittarisassiornermik takutitsivoq, tassami allannguutissatut siunnersuutigineqartoq 2025-mi januaarip aallaqqaataani aatsaat atuutsinneqaletussaavoq, tassa akuersissutigineqarfissaatut ulluliussap kingorna ukiut tallimat sinnerlugit qaangiunneranni. Nalinginnaasumik malittarisassaliortoqartarpoq paasissutissat toqqammavilersorluakkat pissarsiarineqarsimasut tunngavigalugit, taamaalillunini malittarisassat pissutsinut piffissamullu atuuffiulersussamut naapertuutsilerneqartarlutik, Bent Sørensen allappoq.

Ilinniagaqartut amerlanerit

Taassuma ilisimatitsissutigaa, aalisariutini inuttat amerlanerit ilinniartinneqarnerat ingerlalluartoq, qularnarluinnartorli ukiut tallimat qaangiuppata naammaginartumik amerlassuseqalernissaat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER