Naalakkersuisup takornariat Kangerlussuarmukartikkusukkai - Maannakkut
Islandimisulli Kalaallit Nunaat, USA-p Europallu akornanni timmisartukkut angalasut akunniffigisarpaat. Tamanna takornariartitsisarnermut siuariartitsingaatsiarsinnaasoq, Naalakkersuisoq isumaqarpoq.
Nuummi Ilulissanilu timmisartoqarfissat 2023-mi ammarneqarnissaannut piareerniarlugit sanaartorluni ulapittoqaraluarpoq. Aamma Qaqortumi nutaamik timmisartoqarfiliornissamut pilersaaruteqartoqaraluarpoq.
Kangerlussuarli nunami maani timmisartorsuit nunanit allaniit maannakkut miffigisinnaasatuaraat.
- Kangerlussuaq timmisartoqarfituaavoq tikiffigineqarnissaanut maannakkorpiaq pilerinarsarsinnaasara, aamma miffigissallugu pitsaalluinnartuuvoq, Pele Broberg (N) Sermitsiaq.AG-mut oqarpoq.
Taamaammat Inuussutissarsiornermut, Niuernermut, Nunanut Allanut Silallu Pissusaata Allanngoriartorneranut Naalakkersuisunngortup USA-p Europallu akornanni timmisartukkut angalasunut akunniffissatut pilerinarsarneqarnissaa sulissutigipallanniarpara.
Akitsuutit appasissut Coronamillu napparsimasoqannginnera pilerisutsitsilissasut
Minnermi akitsuutit appasissut, nuna coronamik napparsimasoqarfiunngitsoq aamma sermersuarmik takuniaanissamut qimussernissamullu pissanganartunik neqerooruteqarnerit ikiorsiullugit, timmisartuutileqatigiiffiit Amerikamit Avannarlermiit Europaliarnermi Kangerlussuarmut akunnillutik mittarnissaannut pilerisutsinneqalersinnaapput.
- Islandimut akunnilluni minnermi akitsuusersuisoqarneq ajorpoq, tassani ilaasut ingerlaqqinnginnerminni ulluni arfineq-pingasuni nunamiissappata, Pele Broberg oqarpoq.
Islandimi taamatut aaqqissuussisoqarsimavoq, ilaasut misigisassarsiortinneqarnerminni aningaasanik atuisarnerat annertusarniarlugu. Ilaatigut Islandimi taamatut aaqqissuussisimanerup malitsigisaanik takornariartitsisarnermik inuussutissarsiuteqarneq ineriartorluarsimavoq, 2019-imi to millionit missaanniittunik takornariartoqarsimalluni.
Kalaallit Nunaat nunanit allanit 104.000-inik tikeraartoqarsimavoq, taakku 2019-imi nunap aningaasaqarneranut 414 millioner koruuninik tapiisimapput.
Corona apeqqutaasoq
Takornariat Kangerlussuarmukartittarnissaannut pilersaarut Peqqissutsimut Naalakkersuisoqarfik, Coronamut atatillugu Allattoqarfik Naalakkersuisullu sinneri peqatigalugit suliarineqassaaq, Pele Broberg erseqqissaavoq.
Taassuma nassuerutigaa, nuna taamatut ammaasoqarnissaanut piareersimanersoq apeqqutaasoq. Tamanna ullumi Naalakkersuisut Nunatsinnilu Nakorsaaneqarfiup, inuiaqatigiit ammaqqinneqarnissaat akiuussutissalersuinerullu killiffia pillugit ualimut ataatsimut tusagassiortunik katersortitsineranni paasinarsissaaq.
Naalakkersuisut Siulittaasuat Múte Bourup Egede, Peqqissutsimut Naalakkersuisoq Kirsten L. Fencker kiisalu Nunatsinni Nakorsaaneq Henrik L. Hansen tusagassiortunik katersortitsinermi paasissutissiissapput.