Naalakkersuisooqatigiilersut
Naalakkersuisunngortussat saqqummiunneqannginneranni oqaaseqarusuttoqanngitsoq
Naalakkersuisunngortitsisussat naalakkersuisoqarfinnik qanoq agguataarneqassanersut suli oqaaseqarfigiumaneqanngikkallarpoq, ualilluarneranili tamanut saqqummiunnissaat naatsorsuutigineqarpoq
- Oqaaseqarsinnaanngilanga, Demokraatit siulittaasuat Anda Uldum oqarpoq.
Siumukkormiut annerusumik aamma oqaaseqarumanngikkallarput. Siulittaasuat Kim Kielsen takussaanngilaq. Naalakkersuisunngortitsisussalli tamarmik Siumup ataatsimiittarfiani ualeru nalunaaqutaq 15.00 ataatsimiissasut partiip siunnersortaata Mikael Petersenip ilisimatitsissutigaa.
Kikkut naalakkersuisunngussanersut ataatsimiinneq naammassereerpat aatsaat tusarliunneqassaaq.
Atassutikkut aamma oqaaseqarumanngillat.
- Ualeru utaqqisitsinissamut kissaaterput ataqqisariaqarparsi, ataatsimeereerutta aatsaat oqaaseqarumaarpugut, Atassutip qinersinermut ataqatigiissaarisua Jensine Berthelsen erseqqissaavoq.
Eqqoriaanerit aallartereerput
Partiit allaffeqarfiini pissangasoqarnernera maluginiagassaanngitsuunngilaq. Kikkut naalakkersuisunngortinneqassanersut pillugit eqqoriaanerit aamma aallartereerput. Illuatungiliuttulli akornanni aamma apeqqusiisoqarpoq.
- Naalakkersuisunngortussat ukioq ataaseq sinnerlugu atangaarnavianngillat, assigiinngippallaarujussuarput, Partii Naleqqap siulittaasua Hans Enoksen naliliivoq.
Siumut tallimanik Naalakkersuisuutitaqassasoq kiisalu Atassut aamma Demokraatit tamarmik immikkut marlunnik Naalakkersuisuutitaqassasut tusarliunneqartareerpoq.
Naalakkersuisooqatigiinnissamik isumaqatigiissut decembarip sisamaanni atsioqatigiiffigineqarpoq.