Naalakkersuisuni perulluliorneq: Atassut naalakkersuisoqatigiinnit anivoq – Nikkulaat tunuarpoq
Nikkulaat Jeremiassenip (S) aamma Aqqalu Jerimiassen (A) isornartorsiorneqarnerat kingulleq politikkikkut kinguneqarpoq
Aalisarnermut, piniarnermut nunalerinermullu naalakkersusoq, Nikkulaat (S) aamma inuussutissarsiornermut nukissiornermullu naalakkersuisoq, Aqqalu Jerimiassen (A) kingullertigut isornartorsiorneqarnermi kingorna atorfimminnit tunuarput.
Atassut naalakkersuisoqatigiinnit tunuarput, Naalakkersuisut siulittaasuat, Kim Kielsen (S) Inatsisartut oqaluttarfiannit taama oqaluttuarpoq.
Nikkulaat Jeremiassen imaluunniit Aqqalu Jerimiassen inersuarmiinngillat, taamatullu aamma Atassutip siulittaasua, Siverth K. Heilmann peqanngilaq.
Demokraatit ippassaq nalunaarutigaat, partiip naalakkersuisut taakku marluk tatigiunnaarlugit.
Taamaattorli partii ’aaqqiissutissanik naammaginartunik’ nassaartoqassappat, partii tapertaasutut ingerlaqqinnissaminut piareersimavoq, Randi Vestergaard Evaldsen Demokraatit sinnerlugit taama oqarpoq.
Naalakkersuisoqatigiinni partiit iluminni suleqatigiinneq naammagisimaarsimanagu, Atassutip oqaaseqartartua Bentiaraq Ottosen oqarpoq.
- Naalakkersuisoqatigiinni suleqatigiinnermi peqqinnanngitsoqarnikuuvoq, taanna oqarpoq.
Tamatuma saniatigut Atassutip tunuarnera pillugu Kim Kielsenip nalunaaruteqarnera naammagisimaanngitsorujussuuaa. Aatsaat aqaguani partii tunuartussaasoq taassuma ersarissarpaa. Atassut nammineq nalunaaruteqarsinnaatitaassagaluartoq, taanna isumaqarpoq.
Nalunaaruteqarneq aqagumut utaqqisinneqassagaluarpat, ’tukattuliornerussasoq’ Kim Kielsenip oqaatigaa. Ippassaq sianerfigineqarsimalluni taassuma oqaatigaa, Atassullu pingasunngornermi tunuarniartoq nalunaarfigineqarsimalluni.