Naalakkersuisuni ilaasortat eqqissisimatitaajunnaarput
Inatsisartuni tatiginnikkunnaarnermik taasitsinermi qanorluunniit pisoqarsinnaalerpoq. Naalakkersuisooqatigiilersut tassaasut Siumut, Atassut aamma Nunatta Qitortai Demokraatinit ilalerneqartarnissamik isumalluuteqartariaqalerput
Arlaat taamaattussaannartut Naalakkersuisut isigisinnaajunnaarpaat tatiginnikkunnaarnermik taasititsineq atorlugu Inatsisartuni uppisitseriartoqartarnissaani. Ikinnerussuteqarluni naalakkersuisuutitaqarnerup tamanna nassatarivaa.
- Sikuaq maanna tummisarilerparput. Kisianni piniartorsuit sikumi saattumik angallarissorsuit kinguaarivaatigut. Taamaattumik tamanna anigussaqqaarparput, Naalakkersuisut siulittaasuat Kim Kielsen oqarpoq.
Sikulissamiinneq malunniuttarumaarpoq tatiginnikkunnaarnermik taasisoqarnerani tassami illuatungiliuttuulersut Inuit Ataqatigiit aamma Partii Naleqqap tamanna atulersaarpaat.
- Neriuutigiinnarsinnaavara tatiginnikkunnaarluni taasititsinermi partiit assigiinngitsut taasitinnatik eqqarsarluartarumaartut. Maannakkut amerlanerussusiisinnaanerput naalakkersuisuni ilaasortat annaanniaannarlugit atuutinngilaq, Kim Kielsen oqarpoq.
Naalakkersuisut siunnersuutigisamik akuerineqartarnissaat siumut naatsorsuutigereersinnaanngilaat siunnersuutit saqqummiunneqarnissaat sioqqullugu amerlanerussusiiniarluni isumaqatigiinniarneq atortartussaallugu.
- Taamaattoq Demokraatinut isumaqatigiissuteqareerpugut mittarfissuit pillugit, aalisarnermut inatsit pillugut aammalu inuussutissarsiornermut inunnillu isumaginninnermut tunngassuteqartut pillugit, Kim Kielsen oqarpoq.
- Aalajangerniartarneq kigaannerulissanngilaq amerlanerussusiinissaq isumaqatigiinniutigeqqaarlugu suliat naammassineqartalerpata?
- Aporfissaasinnaasunik ujarlernissaq ajornanngittaqaaq. Unammilligassarli sakkortunerpaaq tassaavoq aaqqiissutissanik ujarlerneq. Ikinnerusseqarluni naalakkersuisuutitaqarneq tassaavoq kikkut tamat oqartussaaqataanerisa pitsaanerpaamik inissisimaffia. Partii allat naalakkersuisooqatigiit avataanniittut aamma siunnersuutinik saqqummiussaqarsinnaapput amerlanerussuteqarnit tapersersortinniarsinnaasaminnik. Kisermaassilluni naalakkersuisuuneq Nunatsinni atuussimanngisaannarpoq piffissallu takutiinnarumaarpaa ikinnerussuteqarluni naalakkersuisuutitaqarneq qanoq ingerlajumaarnersoq, Kim Kielsen oqarpoq.