Naalakkersuisuni benziinamut akiliummik annaasaqartoqanngilaq
Aningaasaqarnermut naalakkersuisoq Vittus Qujaukitsoq benziinamut akiliummut malittarisassamik, Naalakkersuisumut ataasiinnarmulluunniit sunniuteqanngitsumik nassiussaqarpoq.
Atorfimmut atatillugu biileqarnermi benziinamut akiliut malittarisassaq aqqutigalugu atoqqusaanngilaq, taanna Vittus Qujaukitsup Namminersorlutik Oqartussat qullersaqarfiani atuutilerseqqammerpaa.
Doris J. Jensenip benziinamut akiliutaanik pisup uteqqinnginnissaanut malittarisassaq siunertaqarpoq, taassuma akiliutaa angallammik orsernermut atornerlunneqarnikuuvoq.
Apersuineq
Namminersorlutik Oqartussani naalakkersuisoqarfinni pisortat tamaasa aqqutigalugit Sermitsiaq.AG ilisimatinneqarpoq, ukiaanerani naalakkersuisunik benziinamut akiliuteqartoqanngitsoq.
Ilinniartitaanermut naalakkersuisoqarfiup Doris J. Jensen atorfianut atatillugu benziinamut akiliummik tunivaa, kisianni maanna Ilinniartitaanermut Naalakkersuisoq Ane Lone Bagger atorfimminut atatillugu biileqanngilaq.
Naalakkersuisoqarfiit sinnerisa aamma ilisimatitsissutigaat, politikkikkut pisortat benziinamut akiliummik atuinngitsut.
Uani sunniuteqassaaq
Naalakkersuisoqarfimmi ataatsimi malittarisassaq maannakkut sunniuteqassaaq. Avatangiisinut naalakkersuisoqarfimmit immikkut ittumik siunertalimmut atorfimmut atatillugu biilimik sapaatip-akunnerani kingullermi atuiniarluni benziinamut akiliummik inniminniisoqarsimavoq.
Taanna akiliut maanna atorunnaarsinneqarpoq, akiliinerlu orsersortarfimmi isumaqatigiissuteqarfigineqarsimasumi akiliineq kisimi pisassaaq, tassanilu normu nalunaarsuutigineqarsimasoq ilisimatitsissutigineqartassalluni.