Naalakkersuisumik tatiginninngikkunnaarnerup Inatsisartuni ataatsimiinneq unitsikkaa
Partii Naleqqap Inuussutissarsiornermut Nukissiuuteqarnermullu naalakkersuisoq, Aqqalu Jerimiassen tatigiunnaarpaat.
Inatsisartuni ataatsimiinneq unikkallarppoq, Inuussutissarsiornermummi Nukissiuuteqarnermullu naalakkersuisoq tatiginnikkunnaarnermik taasititsissutigineqalerpoq. Ataatsimiinneq nal. 12:45 nangeqqissaaq.
Tatiginninnginneq oqaatigineqarpoq sermeq imerlu pillugu inatsisissatut siunnersuut pillugu oqallittoqarnerani.
Erngup atorluarneqarnissaa pillugu Aqqalu Jerimiassen kinami soqutiginnittunik ataatsimiissimassasoq ilimagineqarpoq, tamannalu inatsisitigut tunngavissaqanngitsutut taaneqarluni iluarineqanngilaq.
Naalakkersuisoq Kinami sapaatip akunnerata siuliani suliffeqarfinnik nittarsaavoq.
- Akuerineqarsinnaanngilaq pissaanerillu agguataarsimanerisa paasinnginnerannik Inatsisartunillu ataqqinnginnermillu tunngaveqarpoq, Pele Broberg tatiginnikkunnaarnermini tunngavilersuivoq.
IA-p Partii Naleraq tatiginninnginnermi taperserniarpaa.
Apeqqullu pingaarnersanngorpoq Demokraatit apeqqummut qanoq inississanersut, isumaqataassagunimmi tatiginninnginnermi amerlanerussuteqaleratarsinnaammata.
Kinami suliffeqarfiit nittarsaanneranni, kinami uuliasiorfiit ataatsimeeqatigineqarsimanerat pillugu Randi Vestergaard Evaldsen apeqquteqarpoq.
Inuussutissarsiornermut naalakkersuisoq maanna ataatsimiissinnaanngitsoq, Demokraatit isumaqarput, nunammi iluani uuliasiornermi aningaasaliissutissatut siunnersuutigineqartut 48 milliuunit koruuninik naleqartoq aningaasanut inatsisissatut 2019-imut siunnersuummi suli akuerineqanngimmat.
Pele Broberg aamma oqarpoq:
- Ilanngullugu tusagassiorfinnit tusarparput, suliffeqarfiit nittarsaanneranni naalakkersuisup pisortani pisinnaatissimagaa uuliasiorsinnaanermik neqeroorsinnaasoq. Tamanna inatsisartunit piginnaatinneqanngimmat ataqqinninnginnertut isigaarput.