Naalakkersuisoq: Pinaveersaartitsinermi suliat katsorsaanermi sulianut kalluaanavianngillat
Pinaveersaartitsineq Naalakkersuisunit ukkatarineqarnerulerpat, tamanna isumaqanngilaq ilaqutariit atugarliortunut sullissisussat ikinnerulernavianngillat. Isumaginninnermut Naalakkersuisoq taama oqarpoq.
Isumaginninnermut siunnersortit peqatigiiffiata ernummatigaa Naalakkersuisut pinaveersaartitsinermik ukkataqarnerulernerat, ilaqutariinnillu tamanik ukkataqarnerulernerat, pisariaqartitsivissunik ukkassinermik puigungaqarnermik kinguneqarsinnaasoq: tassalu ilaqutariit atugarliortut.
- Ilaqutariit atugarliortut inuunerat ajorneruleriartussaaq, peqatigiiffimmi siulittaasoq Ellen Magnussen Sermitsiaq.AG-mut oqarpoq.
Ernumaateqarluni allakkiaq pillugu Martha Abelsenip peqatigiiffik naalakkersuisoqarfimmini ataatsimeeqatiserisimavaa. Naalakkersuisoq taama ilisimatitsivoq qularnaaralunilu Naalakkersuisut pinaveersartitsinermik ukkassinerat, ilaqutariit atugarliortunik tunulliussinertut paasineqassanngitsoq:
- Ilaqutariit atugarliortunut suliniutit ingerlaannarput, aamma pinaveersaartitsinermik suliaqarnitsinni. Sinaakkusiinigut politikkigullu tamarluinnarmik ilaqutariinnik tapersersuinissaq qitiutippaat, ilaqutariit nammineersinnaalertikkumallugit. Suliat ilaqutariit peqatigalugit ingerlanneqassapput, qulaatiinnarlugit aalajangiisoqarani, Martha Abelsen oqarpoq.
Ilaqutariit qitiussapput
Taanna nassuiaavoq ajornartorsiuteqartoqartillugu meeqqap angerlarsimaffianiit allamut inissinneqartarnera, siornatigutut annertutigitillugu maanna ingerlanneqassanngitsoq.
- Siornatigut meeraq angerlarsimaffiup avataanut inissinneqartarpoq, soorlu ajornartorsiutitut peerlugu. Maannali ilaqutariit qitiutilluinnarlugit, tamakkerlugit ikiorneqarnissaannik periarfissaqartillugit, sulinerit ingerlanneqarput. Taama tamakkiisumik suliaqarneq, pinaveersaartitsinertaqartumik, isumaginninnerup iluani suliani siunissami oqinnerulersitsisinnaagunarpoq, Martha Abelsen oqarpoq.
Ilinniakkat nutaat
Isumaginninnermut naalakkersuisup Martha Abelsenip oqaatigaa isumaginninnerup iluani sulisussat amigaatigineqartut. Isumaginninnerup iluani suliassanik naammassinninniarnermi Danmarkimi isumaginninnermik siunnersortit suleqatigineqarput.
- Siunissami ajoraluartumik isumaginninnermut siunnersortinik naammattunik sulisoqalernissarput naatsorsuutigisinnaanngilarput. Taamaakkaluartoq allatigut iliuuseqarpugut, tassa siunnersuinermi ikiortitut aamma ilinniagartuutut ilinniagaqarluni isumaginninnerup iluani siunnersortitut ilinniakkanik pilersitsigatta, Isumaginninnermut Naalakkersuisoq oqarpoq.
Siunnersuinermi ikiortitut ilinnialersussat 20-t aamma ilinniagartuutut ilinniagaqarluni isumaginninnerup iluani siunnersortitut ilinnialertussat 20-t SPS-imi ukioq nutaamiit ilinniarlutik aallartissapput.
- Kommunini sulinermi iluaqutaassapput, aamma sulisut piginnaasaannik taamaasilluta qaffassaanissamut periarfissaqartitsivugut, Abelsen oqarpoq.
- Isumaginninnermut siunnersortinut ilinniaqqinnissamut periarfissaasinnaasunik aamma misissuissaagut. Isumaginninnermut siunnersortit peqatigiiffiata ataatsimeeqatigeqqinnerani periarfissat suusinnaaneri eqqartussavagut.