Naalakkersuisoq: Meeqqat akiuussutissalertinnissamut maanna neqeroorfigineqassapput

Meeqqat aqqaneq-marluk 15-illu akornanni ukiullit akiuussutissalertinnissamut maanna neqeroorifigineqassapput, Peqqissutsimut Naalakkersuisoq oqarpoq.

Maannamut inuit 16-ileereersimasut kisimik nunami maani akiuussutissalertinnissamut neqeroorfigineqartarsimapput.

Tamanna maanna allanngortinneqartoq, pingasunngornermi ullup-qeqqanut tusagassiortunik katersortitsinermi oqaatigineqarpoq.

Peqqissutsimut Naalakkersuisup Kirsten L. Fenckerip (N) oqaatigaa, meeqqat aqqaneq-marluk 15-illu akornanni ukiullit akiuussutissalerneqarnissamut neqeroorfigineqassasut.

Nakorsap Paneeraq Noahsenip Nunatsinni Nakorsaaneqarfimmeersup tusagassiortunik katersortitsinermi oqaatigaa, nunami maani maannakkorpiaq 46 tunillatsissimaneranni, tuniluunnerup akiorniarneqarneranut akiuussutissalertinneq sakkuni pingaaruteqarnerpaasoq.

- Nunatsinni Nakorsaaneqarfimmit inassutigineqarpoq, meeqqat aqqaneq-marluk 15-illu akornanni ukiullit ilanngullugit akiuussutissalerneqarnissamut neqeroorfigineqassasut.

Naalakkersuisut inassuteqaammut akuersisut

- Nunanit assigiinngitsunit ilisimatusartoqarsimaneratigut takusinnaavarput, akiuussutissaq meeqqanut illersuutaalluartoq aamma tuniluuttoqarneranik unitsitsisartoq, Paneeraq Noahsen tusagassiortunik katersortitsisoqarmat oqarpoq.

Naalakkersuisup Kirsten L. Fenckerip oqaatigaa, Nunatsinni Nakorsaaneqarfiup meeqqat akiuussutissalerneqarnissamut neqeroorfigineqarnissaannik inassuteqaataa Naalakkersuisunit akuerineqarsimasoq:

- Nunatsinni Nakorsaaneqarfiup naliliinera nalunaarusianit nunanilu tamalaani ilisimatusarsimanernit tunngaveqarpoq.

- Peqqinnissatigut naliliinermi oqaatigineqarpoq, meeqqat akiuussutissalerneqarnissaat tamakkiisumik illersorneqarsinnaasoq, Kirsten L. Fencker oqarpoq.

Sapaatip akunnerata tulliani aallartinneqarsinnaasoq

- Innuttaasut tamarmik tunillanneqarsinnaajunnaarnissaat immaqa anguneqarsinnaanngikkaluartoq, inuit akiuussutissalertissimasut amerlanerulersinneqarneratigut, aqunneqarsinnaanngitsumik tuniluuttoqalersinnaanera annikillisinneqassaaq, naalakkersuisoq oqarpoq.

Paneeraq Noahsen naapertorlugu, innuttaasut tamarmik tunillanneqarsinnaajunnaassappata, innuttaasut 80 procentii sinnerlugit akiuussutissalertissimasariaqartut. Maannakkorpiaq innuttaasut 47 procentii tamakkiisumik akiuussutissalertereersimapput.

Meeqqanik akiuussutissalersuinissamut pilersaarusiorneq suli naammassineqanngitsoq, Naalakkersuisumit oqaatigineqarpoq.

- Naatsorsuutigaarput sapaatip akunnerata tulliani aallartinneqarsinnaasoq.

Powered by Labrador CMS