Naalakkersuisoq: Kommunip timmisartoqarfimmik piginneqataanissaanut piffissaanngilaq
Qeqqata Kommuni kommunimiittumik timmisartoqarfinnik piginneqataarusuppoq, naalakkersuisulli Mariane Paviasenip tamanna takujuminaatsippaa. Piginneqataarusunnerali Naalakkersuisuni oqaloqatigiissutigineqassaaq.
Qeqqata Kommunianit kommunimi timmisartoqarfinnik piginneqataanissaq kissaatigineqarpoq. Kommunip innersuussutigaa, mittarfeqarfinnit piginnittut mitarfinnut ataasiakkaanut qaninnerusumik inissisimatillugit ineriartornerup pitsaanerusarnera misissuisimanerup takutissimagaa.
Taamaammat kommunimit isumaqartoqarpoq, politikkerit Mittarfeqarfiinnik aktiaatileqatigiiffinngortitsiniarpata kommunip piginneqataalersinnaanera ammaanneqartariaqartoq.
Attaveqaasersuutinullu naalakkersuisup Mariane Paviasenip (IA) tamanna aaqqiissutissatut siullertut takusinnaanngilaa. Tassumammi ernummatiginerarpaa, kommunip piginneqataanini sapissannginneraa:
- Oqaatigisinnaavara Naalakkersuisuni tamanna oqaluuserisimannginnatsigu. Oqaatigerusuppara timmisartoqarfinnik qulimiguulinnullu mittarfeqarfinnik ingerlatsineq akisoorujussuusoq, taamaamma timmisartoqarfiit nunap suliassarisariaqarpai, taanna oqarpoq, nangillunilu:
Aserfallatsaaliuinissami kinguaattooqqasoqangaatsiartoq
- Kommunit piginneqataalissagunik suliassaminnik naammassinnissinnaanera ernummatigaara. Isumaqarpunga kommuni timmisartoqarfinnik piginneqataalernissaannut piffissaanngitsoq, piginneqataarusuppatali oqaluuserisariaqassavarput.
Mariane Paviasenip oqaatigaa, timmisartoqarfipaasuit ingerlanneqarnerat akisuinnanngitsoq, aammali Mittarfeqarfinni aserfallatsaaliugassanik kinguaattooqqasoqangaatsiartoq. Ingerlatseqatigiiffiup ukiumoortumik naunaarusiaani kingullermi allassimavoq, kinguaattoorutigineqartut en milliard koruunit missaannik naleqartut.
- Kinguaattooqqavugut, suliassarlu annertooq iliuuseqarfigisariaqarparput, Mariane Paviasen oqarpoq.
Apeqqummulli allamut tunngatillugu kommuni isumaqatigaa. Tassani Kangerlussuarmi eqqagassalerinermik kommunip tiguseqquneqarsinnaanini nangaassutigaa.
Eqqaavissuup akerleriissutaasup aaqqiissuteqarfigineqarnissaanikneriorsuisoq
Kommuni naapertorlugu nunaqarfimmi kommunimilu eqqaavissuaq sumiginnarneqarsimavoq, komunilu Mittarfeqarfiit Namminersorlutillu Oqartussat akiligassaannik tiguserusunnani. Mariane Paviasenip taamatut isornartorsiuisoqarnera tusaasimavaa:
- Qeqqata Kommunianit isornartorsiut tusaasimavarput - eqqaavissuarlu taamatut maannakkut isikkoqartillugu kommunimut tunniunneqassanngilaq. Kommunimmi eqqaavissuup taamatut ineriartortillugulu ingerlanneqarsimanera sunniuteqarfigisimanngilaa. Naalakkersuisoqarfimmi Kangerlussuarmi eqqaavissuaq salinneqarniassammt suliaq erseqqinnerusumik misissuiffigissuaa. Kommunip eqqaavissuarmik maannakkutut isikkulimmik tigusinissani ernummatigissanngilaa.
Apeqqut: Avatangiisinik saliinissap sumiginnarneqarsimaneranik kommuni isornartorsiuigami ilumuunngila?
- Eqqaavissuaq Mittarfeqarfinnit ingerlanneqarsimavoq, naalakkersuisoqarfinnilu tamatumunnga atatillugu akisussaaffeqarpugut. Maanna suleqatigiilluni aallartittoqareerpoq, Kangerlussuarmilu eqqaavissuup iliuuseqarfigineqarnissaanut Avatangiisinut naalakkersuisoqarfimmit kommunimut aningaasaliissuteqartoqarsimavoq. Ajornartorsiutit aaqqiiffiginiarlugit sapinngisannik sulissaanga, Mariane Paviasen oqarpoq.