Naalakkersuisoq: Innaallagissiorfiup imeqarfiani imeq appariartorpoq, kinguaattoorfiunngitsumillu allilerneqartariaqarluni

Nunami maani erngup nukinganik innaallagissiorfeqarnerup annertusarneqarnissaanut pilersaaruteqarneq, aallaqqaammut 3,1 milliarder koruuninik akeqartussatut naatsorsorneqarsimavoq, Naalakkersuisullu ukiakkut ataatsimiinnermi Danmarkip naalagaaffia suleqatigalugu aningaasarpassuit pineqartut qanoq pissarsiaineqarnissaannut pilersaarusiaq saqqummiuppaat.

Pilersaarut malillugu, naalagaaffik Nukissiorfinnut imaluunniit Namminersorlutik Oqartussat ingerlatseqatigiiffiutaanut allamut erngup nukinganik innaallagissiorfiliortussamut taarsigassarsisitsissaaq.

Suliassami pineqarput Utoqqarmiut Kangerluarsunnguanni erngup nukinganik innaallagissiorfiup allilerneqarnissaa kiisalu Qasigiannguanut Aasiannullu pilersuisussamik erngup nukinganik innaallagissiorfiliornissaq.

Inatsisartut Sanaartornermut Ataatsimiititaliaata siunnersuut suliarisimavaa, ataatsimiititaliallu isumaqatigiittup naalagaaffiup aningaasaliissuteqarnissaanik qinnuteqarnissamut pilersaarut tapersersimallugu.

Suliassat ataatsikkut allartinneqarnissaannik kissaateqarneq

Ataatsimiitialiamit Naalakkersuisunut kaammattuutigineqarsimavoq, Nuummi innaallagissiorfiup allilerneqarnissaa nutaamillu innaallagissiorfiliornissaq ataatsikkut aallartinneqassasut.

Tamannali siunertamut naapertuutissanngitsoq, nukissiuuteqarnermut naalakkersuisoq Kalistat Lund oqarpoq. Nutaamimmi innaallagissiorfiliornissamut atatillugu misissuisimanerit takutissimavaat, Nuummi innaallagissiorfiup allilerneqarnissaanut sanilliullugu nutaamik innaallagissiorfiliornissaq suliassaqarfiunerullunilu piffissamik atuiffiunerussasoq, innaallagissiorfiullu Nuummut pilersuisup allilerneqarnissaa nukiginnartuusoq:

- Kangerluarsunnguani Erngup nukinganik innaallagissiorfimmi imeqarfimmi erngup annikilliartornera pissutigalugu, sanaartornerup aammalu allilerinerup naammassinissaata kinguaattoornertaqanngitsumik ingerlanneqarnissaat aningaasaqarnikkut pingaaruteqartorujussuuvoq, Kalistat Lund siunnersuutip Inatsisartuni pingasunngornermi suliarineqarneranut atatillugu ilisimatitsivoq.

Tassunga ilanngutissaaq sapinngisamik pitsaanerpaamik entreprenørit atortuisa sulisuisalu atorluarsinnaanissaat eqqarsaatigalugu suliassat marluusut taakkua nikingatillugit suliarineqarnerannut atasumik aningaasaqarnikkut iluaqutissartaqarsinnaanera anguneqarsinnaammat.

Sanaartornermi aningaasartuutissat 1,5 milliarder koruunit angullugit qaffassimasut

Ataatsimiititaliap suliamik suliarininnermut atatillugu taarsigassarsiarineqarniartut 3,1 milliarder koruuniniit 3,8 aamma 4,6 milliarder koruunit akornannut annertusineqarnissaat akusersissutigisimavaa.

1,5 milliarder koruunit angullugit akiligassap qaffassimaneranut pissutaavoq, suliniutip 2021-mi ukiakkut akuersissutigineqarneraniilli sanaartornermi atortut sulisussallu aningaasartuutaanerulernissaat. Suliassamulli inaarutaasumik akigititassaq qanoq annertutigissanersoq aatsaat entreprenørit sanaartortussat neqeroorutaat tiguneqarpat paasineqassaaq.

Sanaartornermut Ataatsimiititaliamit aamma Naalakkersuisut nutaamik ingerlatseqatigiiffimmik naalagaaffimmit taarsigassarsisussamik pilersitsinissaat akuersissutigineqarsimavoq. Utoqqarmiut Kangerluarsunnguanni erngup nukinganik innaallagissiorfimmik piginnittuuneq ingerlatseqatigiiffimmut nutaamut tunniunneqarsinnaavoq, taamaalilluni innaalligissiorfik allilerneqarsimasoq piginnittumit ataatsimit pigineqartussanngorlugu.

Ataatsimiititaliami isumaqatigiittoqarnerata aamma Inatsisartuni amerlanerussuteqartut isumaqataanerisa malitsigisaannik, siunnersuut pingajussaaneerlugu suliarineqartussanngorlugu ingerlaannartumik ingerlateqqinneqarpoq, tassani inaarutaasumik akuersissutigineqassalluni.