Naalakkersuisoq: Erngup nukinganut akiligassat 1,5 mia. koruuninik amerlissapput
Naalakkersuisunit naatsorsuutigineqarpoq, Nuup eqqaaniittumi Utoqqarmiut Kangerluarsunnguaanni erngup nukinganik nukissiorfiup allilerneqarnissaanut Aasiannullu pilersuisussamik nutaamik nukissiorfiliornissamut aningaasaliissutissat 2023-mi inissinneqarsimassasut. Taarsigassarsianulli aningaasartuutissat naatsorsuutigisamit qaffasinnerunissaat naatsorsuutigineqartariaqartoq, naalakkersuisoq oqarpoq.
Naqqiissut: Ilanngutassiami siusinnerusukkut allaqqangaluarpoq, aningaasaliissutissat ukioq manna inissinneqarniartut. Tamannali aatsaat 2023-mi pissasoq, Naaja H. Nathanielsen ilisimatitsivoq.
Nunami maani erngup nukinganik nukissiorfeqarneq 3,1 milliarder koruunit nalingannut annertusarneqarnissasoq Inatsisartunit siorna ukiakkut aalajangerneqarpoq.
Aningaasarpassuit erngup nukinganik nukissiorfiup Utoqqarmiut Kangerluarsunnguanniittup allilerneqarnissaanut aamma Aasiaat Qasigiannguillu eqqaanni nutaamik erngup nukinganik nukissiorfiliornissamut atorneqassapput.
Tamanna aalajangiunneqarmalli Naalakkersuisut suliassanut aningaasaliissutissarsiorlutik suliaqalersimapput. Naalakkersuisummi taarsigassarsiniartussaapput, pingasunngornermilu Inatsisarttuni apeqqarissaartoqarmat, Aningaasaqarnertmut Naalakkersuisup Naaja H. Nathanielsenip (IA) oqaatigaa, Naalakkersuisunit aningaasaliissutissat ukioq manna naatinnagu inissinneqarsimanissaat naatsorsuutigineqartoq:
Aningaaseriviit arlallit Danmarkilu oqaloqatigineqartut
- Ilaatigut Den Europæiske Investerings Bank, Nordisk Investeringsbank aamma Danmarkimi Finansdepartementet oqaloqatigilluarneqarput.
- Danmarkimi Folketingimut qinersisoqassasoq nalunaarutigineqaraluartoq, aningaasaliissutissat 2023-mi inissinneqassasut suli naatsorsuutigaara, Naaja H. Nathanielsen oqaluttarfimmiit oqarpoq.
Naalakkersuisut aningaasaliissutissat naalagaaffimmit taarsigassarsiariteqqitassatut taaneqartartut inissinniarlugit suliaqartoqarmat, Danmarkimi naalakkersuisut atorfilittallu oqaloqatigaat. Tassa naalagaaffik taarsigassarsisitsissaaq, taarsigassarsiallu Nukissiorfinnut suliniutinik ingerlatsisussamut taarsigassarsiaritinneqassallutik.
Naalagaaffimmit taarsigassarsiariteqqitassat
- Naalagaaffiup taarsigassarsisitseqqinnerani niuernermik tunngavilimmik taarsigassarsisitsisartut taarsigassarsiarititaannit appasinnerusumik erniaqartillugit tamatuma pisinnaanissaa qulakkeerneqarnerusussaavoq, Naalakkersuisut inatsisissatut siunnersuumminni ukiakkut ataatsimiinnermi oqaluuserisassanngortinneqarsimasumi allapput. Inatsisissatut siunnersuut naalagaaffiup taarsigassarsisitseqqiisinnaaneranut periarfissiissaaq.
Inatsisartuni ilaasortap Asii Chemnitz Narupip (IA) apeqqutigaa, erniat qaffakkiartornerat folketingimullu qinersineq aningaasaliissutissat inissinneqarnissaannut qanoq sunniuteqassanersut.
Naaja H. Nathanielsen akissuteqarluni oqarpoq, Danmarkimi piffissami sivitsulersumi qinersisoqarnissaanik naatsorsuutiginnilluni oqallinneq malinnaaffigilluarsimallugu, taakkulu sunniuteqarsinnaanerat piareersimaffiginiarlugu Namminersorlutik Oqartussani suliaqartoqarsimasoq.
Taarsigassarsianut aningaasartuutit qaffassinnerussasut
Naalakkersuisorli nangaassuteqarpoq. Taarsigassarsianummi aningaasartuutissat erniat qaffakkiartornerat, aningaasat naleerukkiartornerat nalorninartorsiortoqarneralu pissutigalugit annertunerujussuusinnaanerat naatsorsuutigineqartariaqarmat :
- Taarsigassarsianut aningaasartuuteqarnerunissarput naatsorsuutigisariaqarparput. Taamaammat tamanna eqqarsaatigalugu nunarsuarmi qanoq inissisimasoqarnera malinnaaffigisariaqarparput, naalakkersuisoq oqarpoq.