Naalakkersuisoq: Atuaqatigiiaat ikilineqassappata ilinniartitsisussaaleqisoqalissaaq

- Unamminarsinnaasut arlaqarput siuliinilu akineqareerpoq ilinniarsimasunik ilinniartitsisussaaleqinerulernissaq unammillernartuussasoq. Nalilersorluagassaavoq ilinniartitsisunik amigaateqarnerulerneq ilumut atuartut ilikkarluarnissaannut iluaqutaassanersoq.

Ilinniartitaanermut naalakkersuisoq Ane Lone Bagger (S) Sermitsiaq.AG-mut oqarpoq.

Nuummi atuarfiit ilaanni Atuarfik Samuel Kleinschmidtimi ilinniartitsisut aamma atuartut atuaqatigiiaat ikilineqarnerannut qanoq sunniuteqarsimanersoq Sermitsiaq.AG-mit qaammat kingulleq allaaserineqarpoq.

Tassani allaaserineqarpoq ilaatigut qanoq ilinniartitsineq qaffariarsimanersoq.

Atuaqatigiiaat agguarneqarsinnaasut

Naalakkersuisut Atuarfik pillugu Inatsisartut inatsisissaannik allannguinissaminni atuarfimmi klassimi ataatsimi atuartut annerpaamik 18-inik amerlassuseqartalernissaannik periarfisseeqqullugit peqquneqarnissaanik Inatsisartut aalajangiiffiginissaannik Peter Olsenimit (IA) siunnersuutigineqartoq Inatsisartunit akuerineqareersoq naalakkersuisup oqaatigaa.

- Aamma kommunit atuaqatigiiaat amerlassusilernissaannut periarfissaqareermata atuarfiillu amerlanerpaartaasa periarfissaq tamanna atorpaat. Ilutigitillugu aamma taasariaqarpoq inatsimmi periarfissaareermat atuaqatigiit holdinut agguartarnissaat kiisalu atuaqatigiit arlariinnik ilinniartitsisoqarsinnaanerat aamma periarfissaareermat, Ane Lone Bagger oqarpoq.

Misissuineq

Nunatsinni atuarfiit amerlanerpaartaat 10-18 illu akornanni agguaqatigiisillugu atuartoqartartut naalakkersuisup oqaatigaa, Nuummi atuaqatigiiaat akornanni agguaqatigiisillugu 16-23-nik atuartoqartut oqaatigalugu.

- Ilinniartitaanermut Aqutsisoqarfik maannakkut misissuinermik ingerlatsivoq paasiniarlugu atuartut coronap naalaani atuartinneqarsimanertik qanoq misigisaqarfigisimaneraat. Pissanganarporlu sunik misissuineq taanna takutitsiumaarnersoq, Ane Lone Bagger oqarpoq.