Naalakkersuisoqatigiit nutaat siammasissumik sillimaniarnermut isumaqatigiissuteqartoqarnissaanut Folketingimut ilaasortanut neriuuteqartitsipput
Siumup aamma Inuit Ataqatigiit akornanni naalakkersuisoqatigiinnerup nunanut allanut sillimaniarnermullu politikkimut amerlanerusunit isumaqataaffigineqartumik isumaqatigiissusiortoqarnissaanut ajornannginnerulersitsisinnaavoq, kalaallit Folketingimut ilaasortat taama neriuuteqarput.
Naalakkersuisoqatigiit nutaat sapaatip-akunnerata matuma aallartinnerani ilisaritinneqarput, tassani Siumup aamma Inuit Ataqatigiit suleqatigiilernertik saqqummiuppaat.
Partiit taakku marluk immikkut Folketingimut ilaasortaatitaqarput, Aaja Chemnitz Larsen (IA) aamma Aki-Matilda Hæegh-Dam (S). Siammasissumik qinersisartut 66 procentii tunuliaqutaralugit suleqatigiinneq, Inatsisartuni sillimaniarnermut politikkimik suliassaqarfimmi siammasissumik isumaqatigiissuteqartoqarsinnaanera, politikerit taakku marluk neriuutigaat.
- Siammasissumik isumaqatigiissusiortoqarnissaanik ukkatarineqarnerata aamma politikkikkut periarfissaanerata, Kalaallit Nunaat pillugu Folketingimi sulinermut pitsaasumik sunniuteqassaaq. Pingaartumik piffissami Ukrainemi sorsuttoqarnerani aamma Ruslandip pissusilersuutaanut tunngatillugu, nunanut allanut aamma sillimaniarnermut politikkimik suliaqarnermi aalajangiisuulluinnarpoq, Aaja Chemnitz Larsen oqarpoq.
Aki-Matilda Høegh-Dam aamma taamatut oqariartuuteqarpoq:
Qulequttat angisuut isumaqatigiissutigisinnaansimanngikkaat
- Piffissami nunarsuarmi sorsuffiusumi, illersornissamut sillimaniarnermullu politikkimi siammasissumik isumaqatigiissuteqartariaqarneq soqutiginartippara.
- Ukiup ataatsip matuma siorna Siumut aamma Inuit Ataqatigiit qulequttanut angisuunut isumaqatigiissinnaasimanngillat. Maanna pingaarnerit ukkatarissallugit isumaqatigiissutigaarput, Aki-Matilda Høegh-Dam oqarpoq, nangillunilu:
- Pitsaasumik anguniagaqartoqarneranik takutitsivoq, uanga taamatut isigaara.
Kangerlussuaq nakkutilliinerlu oqaluuserineqassasut
Suliat aalajangersimasut arlallit aaqqinneqartariaqartut, Aaja Chemnitz Larsen oqaatigaa:
- Politikkikkut suliarpassuit ingerlasut naammassisassatta ukkatarineqarnissaat pisariaqartinneqarpoq. Kangerlussuup attanneqarnissaanut, Kalaallit Nunaata nakkutigineqarnerata nukittorsarneqarnissaanut, peqatigisaanillu eqqissisimatitsisoqarnissaanik sulissuteqarnitsinnut aamma tunngavoq, taanna oqarpoq.
Ruslandip Ukrainemut saassussinerata kingorna illersornissamut sillimaniarnermullu politikki oqaluuserisassani pingaarninngortinneqarpoq. Naalakkersuisut Ruslandimut pillaatitut iliuuseqarnissamut periarfissiisussamik suliaqarnerannik, saassussineq ilaatigut kinguneqarpoq.
