Naalakkersuisoqatigiit nutaamik isumaqatigiissusiortariaqanngitsut
Atassutip Naalakkersuisunut ilaasortani marluk tunuartereernerisa kingorna naalakkersuisoqatigiinnissamut isumaqatigiissummik nutaamik suliaqarnissaq pisariaqanngilaq.
Atassut maanna naalakkersuisoqatigiinnut ikileriangaatsiartunut, Siumumit aamma Vittus Qujaukitsup ilaasortaaffianik inuttaqartunut tapersersortaanersoq paatsiveerusimaarneqarsimavoq.
Atassutip tunuarnera pissutigalugu, naalakkersuisoqatigiinnermut isumaqatigiissummik nutaamik pisariaqartitsisoqanngitsoq, Siumup allattaa Mikael Petersen Sermitsiaq.AG-mut ilisimatitsivoq.
Allaanerussutituaa
- Siulianut sanilliullugu allaanerussutituaraa, Atassutip issiaqataajunnaarnera Naalakkersuisunilu sinniisoqarunnaarnera. Atassut naalakkersuisoqatigiinnut Inatsisartut suliaannut tunngatillugu tunngavioqataapput, Mikael Petersen nassuiaavoq, taanna nunatsinni politikkimi ukiorpassuarni misilittagaqarpoq.
Taamaalilluni Atassut maanna naalakkersuisoqatigiinnut Demokraatit assigalugit tapersersortaasutut inissisimavoq.
- Atassut partii illuatungiliuttuuvoq, naalakkersuisoqatigiinnullu ilaanani. Aamma tapersersortaanngilaq, Siverth K. Heilmann, Atassummi siulittaasoq, Sermitsiaq.AG-mut taama oqarpoq.
Atassut partiinik naalakkersuisoqataasunik aamma Demokraatinut teknikkikkut suleqatigiinnermik ataatsimiititalianut tunngatillugu isumaqateqarnerat, tamatuma allanngortinngilaq.
- Atassut maanna naalakkersuisoqatigiinnermut isumaqatigiissummut atuuttumut immikkoortunik arlalinnik allagaqaqataavoq, mittarfiillu pillugit ilaatigut suleqataassaaq aamma ingammik utoqqarnut illersuisup pilersaarutaanera, Siverth K. Heilmann ilisimatitsivoq.
Amerlanerussuteqartut naatsorsornerat
Partii tapersersortaasoq tapersersortaanngitsorluunniit. Kim Kielsen aamma Vittus Qujaukitsup amerlanerussuteqartitsiniarunik aalajangiisuuallaanngilaq, tassani Inatsisartuni amerlanerussuteqarniaraanni 16-t sinnerlugit ilaasortaasussaapput.
Naalakkersuisoqatigiit ikileriarsimasut ulumikkut amerlanerussuteqarniarlutik Demokraatit tapersersuinissaat kisiat pisariaqartippaat, Atassutip ilaasortaatitai marluk apeqqutaanngimmata.