Naalakkersuisoqatigiit isumaqatigiissutaat: Nunarput - ataatsimoorfiusoq - ineriartorfiusoq - tamanut inissaqartitsisoq

Naalakkersuisoqatigiit isumaqatigiissutaata aallarniutaa uani atuarsinnaavat.

TUNNGAVIUSUMIK ISUMAQATIGIISSUT

Siumut, Partii Naleraq, Atassut aamma Nunatta Qitornai qinigaaffimmi 2018-miit 2022-imut Naalakkersuinikkut suleqatigiissallutik isumaqatigiissuteqarput.

Suleqatigiinnermi pingaartillugu isumaqatigiissutaavoq nunarput inuilu pillugit pitsaasumik, tatiginartumik, tutsuiginartumik innuttaasullu qitiutillugit Inatsisartuni Naalakkersuisunilu sullissinissaq.

Inuiaqatigiit ineriartornerat nunarsuarmioqatigiinnermilu nukittuumik inissisimanerat annerulerseqqullugit partiit pineqartut naalakkersuinikkut siunnerfeqaqatigiillutik sulissapput – Inatsisartuniinnaanngitsoq Naalakkersuisuniinnaanngitsoq, aammali inuiaqatigiinni tamani suleqatigiinnerup siuarsaavigineqarnissaa ilanngullugu sulissutigineqassaaq.

Partiit akunnerminni isumaqatigiissutigivaat iluarsartusseqqinnertigut sulissutigineqassasoq innuttaasut atugarisaasa pitsanngorsarnissaat aammalu minnerunngitsumik aningaasarsiornikkut siuariartortitsisoqarnissaa, taamaaliornikkut suliffissat nutaat pilersinneqarsinnaassammata sulisinnaasullu amerlanerusut sulilersinneqarlutik.

Naalakkersuisooqatigiit tatigeqatigiillutik ataqqeqatigiillutillu ukiuni tulliuttuni sisamani suleqatigiilluarnissartik isumaqatigiissutigaat. Nunatta sutigut tamatigut toqqissisimanartumik ineriartortinneqarluni siuariartornissaa ataatsimoorfiusumik suliarineqassaaq.

Nunatta oqaluttuarisaanerani maannamut suliniutit annersaat nutaanik mittarfinnik pilersitsinissaq naammassiniarlugu naalakkersuisooqatigiit sulissapput, aammalu erngup nukissiorfissat nutaat sanaartorneqarnissaat anguniarlugu sulissallutik.

Naalakkersuisooqatigiit suliassat makku nalilersorluarlugit suliariniarpaat:

● Atuartitaanikkut ilinniartitaanikkullu aaqqissuusseqqinneq

● Piorsarsimassutsikkut nukittorsaaneq ingerlateqqinneqassaaq

● Inunnik isumaginninnikut sullissineq pitsanngorsarneqassaaq

● Innarluutillit pillugit inatsisissaq naammassineqassaaq

● Peqqinnissakkut sullissineq pitsanngorsarneqassaaq

● Ineqarnikkut aaqqissuusseqqinneq suliarineqassaaq

● Aalisarneq pillugu inatsit naammassillugu suliarineqassaaq

● Aallaaniarneq piniarnerlu pillugit inatsit nutarterneqassaaq

● Illoqarfinni nunaqarfinnilu tunisassiorfeqarneq piorsaqqinneqassaaq

● Inuussutissalerineq pillugu inatsit nunatsinnut naleqqussarneqassaaq

● Oqaatsit pillugit inatsisissaq suliarineqassaaq

● Inuiaqatigiinnut akuulersitsineq pillugu inatsiseqalissaagut

● Sulisoqarneq pillugu inatsisitigut naleqqussaassaagut

● Niuerneq niueqatigiinnerlu pillugit inatsisitigut naleqqussaanissaq

● Akileraarutit, akitsuutit, iluanaarusiisarnerlu pillugit inatsisitigut naleqqussaanissaq

● Qinersisarneq pillugu inatsit naleqqussarneqassaaq

● Akisussaaffiit naalagaaffimmiit tigusassavut pillugit tulleriiaarissaagut

● Tunngaviusumik inatsisissaq pillugu suliat ingerlateqqissavagut.

● Avatangiisit pillugit aningaasaateqarfik pilersinneqassaaq

Nunatsinni innuttaasut atugarisaasa pitsanngorsarnissaat pingaarnerpaatillugu ingerlatsisoqassaaq. Meeqqat, ilaqutariit meerartallit, utoqqaat, innarluutillit, napparsimasut siusinaartumillu pensionisi- allit ilinniartullu atugarisaat pitsaanerulersinniarlugit aaqqissuusseqqinnerit suliarineqassapput.

Utoqqaat tunngaviusumik utoqqalinersiutiminnik ilanngaaffigineqaratik sulinermikkut isertitaqarsinnaanerat aaqqiivigineqassaaq, 2019-imiit aallartittumik. Utoqqaat tamarmik naligiimmik tunngaviusumik utoqqalinersiuteqalersillugit, saniatigut suliffeqarneq, katissimaneq, aappariinneq najungaqatigiinnerluunniit apeqqutaatinnagit.

Suliffeqarnermi ilanngaat 2019-imiit aallartittumik eqqunneqassaaq isertitakinnernut akunnattumillu isertitaqartartunut annertusiartuaartumik iluaqusiisumik.

Naalakkersuisooqatigiinneq

Naalakkersuisooqatigiit isumaqatigiissutigaat naalakkersuisooqatigiinneq unneqqarissumik, tatigeqatigiilluni illuatungeriillu imminnut ilumoorfigeqatigiinnerannik tunngaveqassasoq.

Isumaqatigiissutigineqarpoq ammasumik aqutsineq toqqammavigalugu nunarput naalakkersuinikkut aqunneqassasoq, taamaammallu pisortani atorfiit qaffasinnerpaat inuttalersoneqartarnerini periutsit aqutsinermut naleqqussarlugit nutarterneqassapput.

Naalakkersuisooqatigiit pisortat ingerlatsiviini tamani allaffissornikkut ingerlatsinerup annikillisarneqarsinnaanera misissussavaat. Ilanngullugu inuiaqatigiinni qaammarsaanerup ingerlaqqinnissaa suliarineqassaaq.

Nunarput inuilu nunarsuarmioqataanermillu aallaaveqartumik innuttaasut oqartussaaqataanerat akisussaaqataanerallu ataqqillugu aqunneqassaaq, innuttaasut taakkulu pisariaqartitaat aallaavigalugit ingerlatsineq naligiimmillu atugassaqartitsineq sulissutigissallugu. Taamaammat naalakkersuisooqatigiinnermi siunnerfiit isumaqatigiissutigineqartut piviusunngortinneqartarnis- saannut ataqatigiissaarisartussanik naalakkersuisooqatigiit pilersitsissasut isumaqatigiissutigineqarpoq.

Naalagaaffinngornissaq anguniarlugu tunngaviusumik inatsisissamik suliaq aallartinneqareersoq qinigaaffimmi nangittumik ingerlateqqinneqarnissaa naalakkersuisooqatigiit isumaqatigiissutigaat, tamatumani partiit kiffaanngissuseqassapput ilaasortassaminnik toqqaanissamut.

Inuit oqartussaaqataanerat ataqqillugu, nunattalu naapertuunnerusumik sinniiseqartarnissaa qulakkeerumallugu, naalakkersuisooqatigiit isumaqatigiissutigaat Inatsisartunut qinerseriaaseq nalilersoqqissaarneqassasoq.

Partiit suleqatigiilersut Nunatsinnut inuinullu sutigut tamatigut ilumoorlutik sullissinissartik pingaarnerpaatippaat. Nunarpummi tassaassaaq innuttaasut immikkoortinneqaratik toqqissisimallutik ataatsimoorlutik suleqataallutik angerlarsimaffigisinnaasaat.

Isumaqatigiissut tamaat una linki tooriarlugu atuarsinnaavat.

Powered by Labrador CMS