Naalakkersuisoqatigiit isasoorput: Partii Naleraq Naalakkersuisunit tunuarpoq

Partii Naleraq nal. 15.30 tusagassiortunik katersortitsinissamut aggersaaqqammerpoq.

Tamatumani partiip siulittaasua Hans Enoksen nalunaarpoq, partii naalakkersuisoqatigiinnermit tunuartoq.

Mittarfiliortiternissaq pillugu isumaqatigiinnginneq pissutigalugu partii taamatut alloriartariaqalersimavoq.

Partiimit pingaartumik Danmarkip naalagaaffiata mittarfinnut aningaasaleeqataajumallernera naammagineqanngilaq.

Partip politikkikkut oqaaseqartartua, Jens Napaattooq, ippassaq Sermitsiaq.AG-mut oqaluttuarpoq, Partii Naleqqap Danmarkip Kalaallit Airportsimut piginneqataalernissaa akuersaarneqarsinnaanngilluinnartoq.

Sermitsiaq.AG-p paasissutissaatai naapertorlugit, Partii Naleraq naalakkersuisoqatigiinnut ullumi siusinnerusukkut nalunaarpoq, partii naalakkersuisoqataajunnaartoq. Allakkiaq matuma ataani atuarneqarsinnaavoq.

Naalakkersuisoqatigiinni aaqqiagiinnginneq piffissami sivitsulersumi atuussimavoq. Aallaqqaammulli paasinarsisimavoq Partii Naleraq mittarfiliortiternissanik siunnersuutigineqartutut piviusunngortitseqataarusunngitsoq, taarsiulluguli isumaqarluni, mittarfiit naannerusut sananeqarsinnaagaluartut.

Tamatuma saniatigut partiip piffissami kingullermi piumasaraa Naalakkersuisunut tapersersuineq ingerlaannassappat Qaanaami Ittoqqortoormiinilu pisassiissutit killilersugaajunnaassasut.