Naalakkersuisoqarfinni pisortat arlallit atorfii ukioq manna atorunnaartussaapput
Namminersorlutik Oqartussani naalakkersuisoqarfinnit quliusunit pingasut ukioq manna pisortassarsiortussaapput, maanna pisortaasut piffissami aalajangersimasumi atorfeqartinneqarnerat atorunnaartussaammata.
Nunalerinermut, Imminut Pilersornermut, Nukissiuuteqarnermut Avatangiisinullu Naalakkersuisoqarfimmi pisortap Mette Skarregaardip, Aatsitassanut Inatsisinillu Atuutsitsinermut Naalakkersuisoqarfimmi pisortap Jørgen T. Hammeken-Holmip aamma Aningaasaqarnermut Naalakkersuisoqarfimmi pisortap Nikolai S. Christensenip ukioq manna namminneq atorfimminnut qinnuteqaqqissanerlutik eqqarsaatersuutigisariaqarpaat.
Piffissamimi aalajangersimasumi atorfeqartinneqarnerat atorunnaartussaavoq, atorfiillu taamaammat inuttassarsiuunneqassallutik.
Jørgen T. Hammeken Holm 2015-imi septembarip qaammataani Aatsitassanut Naalakkersuisoqarfimmi pisortatut atorfinitsinneqarpoq. Ukiuni sisamani atorfeqareersoq atorfia ukiunik pingasunik sivitsorneqareersoq septembarip qaammataani atorunnaartussaavoq. Nammineq atorfimminut qinnuteqaqqinniarnerluni oqaatigerusunngilaa.
Qinnuteqarniarnerlutik oqaaseqarusunngitsut
Også Mette Skarregaard aamma Nikolai S. Christensen 2015-imi aamma atorfinitsinneqarput, atorfiilu ukiunik pingasunik sivitsorneqarsimallutik. Taakku marluullutik aamma atorfimminnut qinnuteqaqqinniarnerlutik oqaatigerusunngilaat.
Naalakkersuisoqarfinni pisortassanik atorfinitsitsisarneq malittarisassat erseqqilluinnartut aamma atorfinitsitsinissamut kaajallaasitami atorfinitsinneqarnissamut piukkunnaatilinnut piumasaqaatit malillugit pisarpoq.
- Atorfinitsitsinissamut kaajallaasitaq atorfinitsitsinissatsinnut tunngaviusoq malillugu sulisarpugut. Kaajallaasitaq kalaallisut allassimasoq tunngaviatigut malittarparput, Múte B. Egede Sermitsiaq.AG-mut oqarpoq.
Oqaatsitigut piumasaqaataasoq nalilersorneqartoq
Atorfinitsitsinissamut kaajallaasitami piumasaqaatigineqartut ilagaat oqaatsitigut piginnaasaqarnissaq. Inuit ilaannit oqaatigineqartarpoq, atorfinitsitsinissamut kaajallaasitap kalaallisoortaa danskisoortaalu assigiinngitsunik paasineqarsinnaasartut, taamaammat kaajallaasitami oqaasertaliussat iluarsartuunneqassanersut maannakkorpiaq nalilersorneqarput.
- Kaajallaasitap danskisoortaani kalaallisoortaanilu assigiinngissutaasinnaasut misissuleruttorpavut, imminnut naapertuuttuunissaat assigiinnissaallu anguniarlugit, Múte B. Egede oqarpoq.
Múte B. Egedep oqaatsitigut piginnaasaqarnissamik piumasaqaat oqaaseqarfigerusunngilaa, atorfinitsitsinissamullu kaajallaasitaq innersuussutigalugu.