Naalakkersuisoqarfimmi pisortaq: Tibetimut tapersersuisoq ingerlaqqunikuunngilarput
Isummanik siaruaaterisup tassaniissinnaanera erseqqissumik oqaatigisimallugu, Nunanut Allanut Naalakkersuisoqarfiup pisortaa oqarpoq.
Nunanut Allanut Naalakkersuisoqarfimmi atorfilittat Tibetimut tapersersuisoq Jan Seidsen ingerlaqqusimanngilaat. Naalakkersuisoqarfimmi pisortaq Kenneth Høegh Sermitsiaq.AG-mut taama oqarpoq.
Jan Seidsenip Raio24syvimut oqaluttuarnera naapertorlugu, naalakkersuisoqarfimmi pisortap atorfilittallu allap, aggustimi Katuami Kinamiut filmfestiveqarneranni ingerlaqqusimavaat.
- Ingerlaqqullugu qinnuiginngilarput, Kenneth Høegh oqarpoq.
Isummanik siaruaateriniartoq aaqqissuussamut aggerpoq, taannalu ‘’Free Tibet’’-mik tujuuluaralerluni, Tibetip erfalasuanik tigummiarluni quppersakkanik agguaavoq.
Kinamiut aallartitaat Danmarkimi kinamiut aallartitaannik, Deng Yinhimit peqataaffigineqartut, filmfestivaalip ammaanersiorneqarneranut peqataapput.
- Jan Seidsen tassaniinnissaminut pisinnaatitaaffeqartoq erseqqissumik oqarfigaarput. Taanna aaqqissuussaq akerliussutsimik takutitsiffiunissaanut tulluartuunngissoralutigu oqaatigaarput, kisianni tassaniinnissaa ataqqillugu aamma oqaatigalugu, naalakkersuisoqarfimmi pisortaq oqarpoq.
Jan Seidsen aaqqissuussamit peersinneqanngilaq.