Naalakkersuisoqarfimmi pisortaq: Tasiusami benzina kuuttoq pillugu pisoq aqunneqartumik ingerlavoq

Juunip 26-ani nunaqarfiup Tasiusap eqqaani benziina 1.000 literit missaanni annertussuseqartoq imaanut kuuppoq. Tamanna ajorpoq, kisianni uulia kinertoq pineqartuuppat pisoq allaalluinnarsimassagaluarpoq, naalakkersuisoqarfimmi pisortaq Mette Skarregaard Pedersen oqarpoq.

Orsussat oqinnerusut, soorlu benzina, sukkasuumik aalannguuttarput, Pinngortitamut Avatangiisinullu naalakkersuisoqarfimmi pisortaq oqarpoq.

Nunalerinermut, Imminut Pilersornermut, Nukissiornermut Avatangiisinullu naalakkersuisoqarfimmi pisortaq, Mette Skarregaard Pedersen taama oqarpoq.

Nunaqarfimmi Tasiusami tankeqarfik ulikkaarmat benzina 1.000 literit missaanniittoq imaanut kuunneranit, sapaatip akunnera missaa qaangiuttoq, taama oqaaseqarpoq.

Sukkasuumik aalanngortartoq

Kommune Kujallermi upalungaarsimasut katersorneqarsinnaasoq katersorsimagaat, Mette Skarregaard Pedersen nassuiaavoq.

Mingutsitsinerup qanoq annertutigisimanera paasineqarpa? Avatangiisimullu qanoq sunniuteqassava?

- Upalungaarsimasut benzina kuussimanerarpaa. Taanna uuliamut oqimaatsumut sanilliullugu sukkasuumik aalannguuttarpoq.

Imaani mingutsitsisoqartillugu soorunami pitsaasuusanngitsoq, naalakkersuisoqarfimmi pisortap nassuiarpaa, kisianni uulia oqimaatsuunngimmat qujanarpoq, upalungaarsimasullu pisoq suliaripallappaat.

Akisussaaffimmik agguataarinninneq

- Milluaasut atorneqarput. Atortut takisuut milluaasartuupput, upalungaarsimasullu siaartarpaat, immallu qaavani milluaasarput. Pisumilu tassani taanna pitsaanerpaavoq.

Ajutoornerit tankeqarfinnik ulikkaarinnippallaarnerit nunami pisut kommunip akisussaaffigisarai, Mette Skarregaard Pedersen nassuiaavoq, kisianni imaani pigaangata – soorlu uani pisumi – Namminersorlutik Oqartussat peqataatinneqartuaannarput.

Namminersorlutik Oqartussat tassunga atatillugu benzina literit arlaqartut, sapaammi 26. juni Tasiusap eqqaani imaanut kuussimasut katersorneqarnerinut atortut pisariaqartinneqartut tunniuppaat.

Powered by Labrador CMS