Naalakkersuisoqarfimmi pisortaq tunuartitaasoq: Jørgen Isak Olsen aalisarnermut naalakkersuisoqarfimmi suliunnaarpoq
Ukiuni arlalissuarni naalakkersuisut aalisarnermut piniarnermullu naalakkersuisoqarfianni atorfeqareerluni, nunatsinni naalakkersuisoqarfiit pingaarnersaasa ilaanni pisortatut Jørgen Isak Olsen suliunnaarpoq.
Nutartigaq: Allaaserisap avammut saqqummiunneqarnerata kinguninngua Naalakkersuisunit ilisimatitsissutigineqarpoq immikkoortortaqarfimmi pisortaq, Emanuel Rosing nutaamik naalakkersuisoqarfimmi pisortartaartoqarnissaata tungaanut pisortaagallassasoq.
Ukiut qulingajaat. Taamak sivisutigisumik aalisarnermut, piniarnermut nunalerinermullu naalakkersuisoqarfimmi pisortatut Jørgen Isak Olsen sulinikuuvoq.
Nunalerinermut tunngasortaa Naalakkersuisut maanna atuuttut aallartimmata naalakkersuisoqarfimmut allamut nuunneqarnikuuvoq, taamaammallu naalakkersuisoqarfiup ullumikkut ingerlatai taamaallaat aalisarnermut piniarnermullu tunngassuteqarput.
Sermitsiaq.AG-ip paasissutissinneqarnera tunngavigalugu Jørgen Isak Olsen atorfimminit tunuarsimavoq.
Sermitsiaq.AG-mit aalisarnermut piniarnermullu Naalakkersuisoq, Karl Tobiassen (S) oqaaseqartinniaraluarparput, atorfimmi pineqartumi sooq nutaamik inuttaliinissaq pisariaqartinneqarsimanersoq.
Jørgen Isak Olsen-ip atorfini ukiunik aalajangersimasunik isumaqatigiissuteqarfiummat kingusinnerpaamik september 2020-mi qinnuteqaqqinnermigut atorfigiinnartussanngornikuuaa.
Sermitsiaq.AG-mit Jørgen Isak Olsen pissarsiaraarput, taassumalu ilumoornerarpaa naalakkersuisoqarfimmi pisortatut tunuartitaasimalluni itinerusumilli oqaaseqarfigiumanngilaa.
Aalisarnermut inatsisissaq kinguaattoortoq
Septemberip aallaqqaataani Naalakkersuisut ilisimatitsipput, aalisarnermut inatsisissatut siunnersuut naammassineqarsinnaasimanngitsoq, tassani pissutaatinneqarluni "amerlanerussuteqarluartunik tunuliaqutaqarnissaq" suli iluatsissimanngimmat, taamaammallu aalisarnermut inatsisissaq aatsaat Inatsisartut upernaakkut 2024-mi ataatsimiinnissaannut suliarineqartussanngortinneqartoq, naatsorsuutigineqartorlu 1. januar 2025-mi inatsit nutaaq atuutilersinneqassasoq.
Taanna pissutaasimasinnaanersoq, tassa aalisarnermut inatsisissap kingumut kinguaattoornera pissutaasimanersoq Naalakkersuisut maanna naalakkersuisoqarfimmi pisortamik nutaamik pissarsiortariaqalernerannut, akissutisinissaq suli utaqqisariaqarparput.
Naalakkersuisunut ilaasortaq, Karl Tobiassen (S) danskit inuussutissalerineremut, nunalerinermut aalisarnermullu naalakkersuisuannik, Jacob Jensen (V) ataatsimeeqateqaqqammerpoq tassani uumasunut nakorsaqarfik inuussutissalerinermullu oqartussaqarfik nunatsinnut nuunneqarnissaanut suliniutit killiffiat oqaluuserineqarpoq, aammalu Karl Tobiassen-ip naatsorsuutiginerarpaa Inatsisartunut killiffimmik nalunaaruteqarumaarluni.
Jørgen Isak Olsen 2009-mili aalisarnermut, piniarnermut nunalerinermullu naalakkersuisoqarfimmi sulilernikuuvoq, siullermik immikkoortortaqarfimmi pisortatut, kingusinnerusukkut pisortap tulliatut, 2013-miillu naalakkersuisoqarfimmi pisortatut sulilluni.
