Naalakkersuisoqarfimmi pisortaq pinerluuteqarsimasunik isumaginnittoqarfimmi pisortanngussasoq
Naalakkersuisoqarfimmi pisortaasimasoq Julie Præst Wilche Kalaallit Nunaanni Pinerluuteqarsimasunut isumaginnittoqarfimmi pisortanngussaaq, Naaja Nathanielsenip ukioq manna apriilip qaammataani qinersisoqareersoq politikkikkut suliniarluni pinerluuteqarsimasunut isumaginnittoqarfimmi suliunnaarnerata kingorna.
49-nik ukiulik Julie Præst Wilche 2015-imili Isumaginninnermut Inatsisinillut Atuutsitsinermut Naalakkersuisoqarfimmi pisortaasimavoq. Septembarip aallaqqaataani pinerluuteqarsimasunut isumaginnittoqarfimmi pisortatut sulilissaaq.
- Kalaallit Nunaanni Pinerluuteqarsimasunut isumaginnittoqarfimmi sulilernissara qilanaarisupilussuuara. Atorfissanni naalakkersuisoqarfimmi pisortatut sulininni misilittakkakka ilisimasakkalu ataqatigiississinnaavakka, tassa ilaatigut inatsisinik atuutsitsinermi suliaqarninni inuit inuiaqatigiinnilu unammilligassat pillugit misilittakkakka eqqarsaatigalugit. Pinerluuteqarsimasunut isumaginnittoqarfimmi sulisut suleqataasartorpassuillu suleqatigilernissaat qilanaaraara, Julie Præst Wilche oqarpoq.
Peqqissaasutut ilinniarsimasoq
Pisortanngorlaat peqqissaasutut ilinniarsimasuuvoq, kingusinnerusukkullu Cand. Scient. Adm.-itut ilinniarsimalluni. Peqqissutsimut Naalakkersuisoqarfimmut attuumassuteqartumik sulisarsimavoq, tassani atorfiit arlallit suliffigisimallugit, ilaatigut naalakkarsuisoqarfimmi pisortaagallarsimalluni.
- Julie Præst Wilchep pinerluuteqarsimasunut isumaginnittoqarfimmu tikilluaqqunissaa qilanaaraara. Naalakkersuisoqarfimmi pisortatut misilittaqarluarnermigut, Kalaallit Nunaanni Pinerluuteqarsimasunut isumaginnittoqarfiup ukiuni kingullerni pitsaasumik ineriartorsimanerata ingerlaannarnissaa qulakkeerinneqataaffigisinnaavaa, Pinerluuteqarsimasunut isumaginnittoqarfimmi pisortaq Ina Eliasen oqarpoq.
Julie Præst Wilchep Naaja Nathanielsen 2021-mi apriilip naanerani suliffimminit tunuartoq taarsissavaa.