Naalakkersuisoqarfimmi pisortaq isornartorsiuisoqareersorlu: - Ikiuniarluta sapinngisatsinnik iliuuseqarpugut
Siulittaasup Naalakkersuisoqarfia Tunngaviusumik inatsisissaq pillugu Isumalioqatigiissitat ikiorniarlugit sapinngisaminnik iliuuseqarsimasoq, naalakkersuisoqarfimmi pisortaq isumalioqatigiissitani aningaasaqarneq pillugu isornartorsiuisoqareersorlu taama oqarpoq. Múte B. Egedep suliaq naalakkersuinikkut akisussaasuni qullersatut oqaaseqarfigiumanngilaa.
Tunngaviusumik inatsisissaq pillugu Isumalioqatigiissitani ajornartorsiutit arlallit kukkunersiuisartut EY Kalaallit Nunaata misissuinerani qulaajarneqarput. Ilaatigut sulisut annertuumik taarseraannerannut, naatsorsuuserinermi ajornartorsiuteqarneq kiisalu sipaarniarluni pissusilersunnginnermik isornartorsiuinermut tunngapput.
Ajornartorsiutit pillugit Sermitsiaq.AG Naalakkersuisut siulittaasuannit Múte B. Egedemit (IA) oqaaseqartitsiniaraluarpoq, kisianni suliaq pillugu oqaaseqarusunngilaq. Isumalioqatigiissitat isumaliutissiissutaasa imarisaanut taamaallaat oqaaseqarusulluni innersuussivoq.
Siulittaasup Naalakkersuisoqarfiani pisortap Hans-Peder Barlach Christensenip isumalioqatigiissitat tapersersorniarlugit iliuuseqartoqarnerusimasinnaanersoq allagaqarluni akissuteqarfigerusuppaa.
Qinnuiginnippata ikiuisinnaasut
Apeqqut: Sooruna Siulittaasup Naalakkersuisoqarfia assersuutigalugu isumalioqatigiissitat allattoqarfiat ikiorniarlugu iliuuseqarnerusimanngitsoq? Naalakkersuisoqarfittut Tunngaviusumik inatsisissaq pillugu Isumalioqatigiissitat sulineranni sinaakkutit allanngujaannerusut pilersinniarlugit iliuuseqarnerusimasinnaagaluarpisi?
- Apeqqut ”iliuuseqarnerusimasinnaanermut” tunngasoq qanoq ililluni pinngornersoq takusinnaanngilara, tassami qinnuiginninneq malillugu sapinngisatsinnik ikiuivugut.
- Isumalioqatigiissitat atuunnermini attuumassuteqannginnera oqaatigissavara, taamaammat ikiuinissatsinnut periarfissavut taamaallaat aningaasaqarnermik nakkutilliinermiipput, kiisalu isumalioqatigiissitat kissaatigisaat malillugit ikiuisinnaanermi, Hans-Peder Barlach Christensen, Sermitsiaq.AG-mut allagaqarluni taama akissuteqarpoq.
Sukaterisoqarsimasoq
Paasisaqarniarluni ikiuiniarlunilu kukkunersiuisarfinnit nalunaarusianik marlunnik suliakkiisoqarsimasoq, naalakkersuisoqarfimmi pisortaq ilisimatitsivoq.
- EY sinnerlugu akisinnaanngilanga, kisianni - inassuteqaatini atuarneqarsinnaasut malillugit – aningaasaqarnermik aqutsinermut tunngatillugu sukaterisoqartussaasimavoq, tamannalu aamma EY nalunaarusiornerata siornatigut kingornalu pisimavoq, Hans-Peder Barlach Christensen allappoq.
Sermitsiaq.AG-p nalunaarusiap aappaata tunniunneqarnissaa piumasaraa, kisianni naalakkersuisoqarfimmi pisortap tamanna itigartitsissutigaa. Misissuineq taanna isumalioqatigiissitani ilaasortat akissarsiaannut tunnganerarneqarpoq.
Allakkat tamaasa tunniunnianngikkaat
EY Kalaallit Nunaat misissuinermini nalunaarusiamut innersuussivoq, kukkunersiuillunilu misissuinermi akissarsiaqartitsineq sipaarniarnermik ileqqulersortoqarsimanngitsoq naliliisoqarpoq.
- Jens-Frederik Nielsenimut § 37 naapertorlugu aningaasartuutinut apeqqutinut tunngasunut akissuteqartussaavugut, tassani kisitsisit pingaarnerit akissarsianut tunngasut atuarneqarsinnaassapput. Allakkanut tunngatillugu taakku Nunatta Allagaateqarfianut tunniunneqartussaapput, taakku nalunaarsorneqareerpata takunninnissamut qinnuteqarsinnaavusi, naalakkersuisoqarfimmi pisortaq akissarsianut tunngatillugu apeqqummut taama oqaaseqarpoq.
Sermitsiaq.AG taamatut akissuteqartoqarnerata kingorna nalunaarusiamik allagaatinik takunnikkumalluni qinnuteqarpoq, taassuma akineqarnissaa utaqqivarput.