Ilaqutariinnermut Naalakkersuisoqarfik

Naalakkersuisoqarfimmi pisortaq alla aamma tunuartoq

Naalakkersuisut siulittaasuata, Siumumeersup Kim Kielsenip, Inatsisartuni Inuit Ataqatigiit ilaasortaatitaanut, Agathe Fontainimut, paragraf 37 naapertorlugu akissuteqaammini uppernarsarpaa Ilaqutariinnermut Naligiissitaanermut Isumaginninnermullu Naalakkersuisoqarfimmi pisortaq tunuarsimasoq

Ilaqutariinnermut Naligiissitaanermut Isumaginninnermullu Naalakkersuisoqarfimmi pisortatut Susie Marthin Kjeldsen tunuarpoq

Namminersorlutik Oqartussani atorfilittat qullasinnerpaartaata, Naalakkersuisut Siulittaasuata Nalaakkersuisoqarfiani Naalakkersuisoqarfiup pisortaata Svend Hardenbergip atorfimminit - piffissami killiligaanngitsumi - tunuartinneqarallaqqanerata nalaani, Naalakkersuisut siulittaasuata, Siumumeersup Kim Kielsenip, maanna aamma ilisimatitsissutigaa naalakkersuisoqarfimmi pisortat ilaat alla aamma maanna tunuarsimasoq.

Naalakkersuisummi siulittaasuata, Siumumeersup Kim Kielsenip, Inatsisartuni Inuit Ataqatigiit ilaasortaatitaanut, Agathe Fontainimut, paragraf 37 naapertorlugu akissuteqaammini uppernarsarpaa Ilaqutariinnermut Naalakkersuisoqarfimmi pisortaq tunuarsimasoq.

- Uppernarsarsinnaavara naalakkersuisoqarfimmi pisortaq (Susie Marthin Kjeldsen, Ilaqutariinnermut Naligiissitaanermut Isumaginninnermullu Naalakkersuisoqarfik, aaqq.) illuatungeriit isumaqatigiissuteqarnerat malillugu 2015-imi februaarip qaammaataata naaneranit atorfimminit tunuarmat, taama Kim Kielsen Inuit Ataqatigiinnersumut Agathe Fontainimut akissuteqarluni allappoq.

Atuaruk: Naalakkersuisoqarfiup pisortaa Svend Hardenberg atorfimminit tunuartinneqarallarpoq

Atuaruk: Naalakkersuisoqarfimmi pisortaasup suliunnaarnera IA-mit ernumagineqarpoq

Taamaammat Naalakkersuisut nalunaaruteqanngillat
Agathe Fontainip paragraf 37 naapertorlugu apeqquteqarpoq Inuit Ataqatigiit tusarsimammassuk Ilaqutariinnermut Naligiissitaanermut Isumaginninnermullu Naalakkersuisoqarfimmi pisortaq tunuarsimasoq.

Naalakkersuisut siulitaasuata, Siumumeersup Kim Kielsenip, ilisimatitsinera malillugu naalakkersuisoqarfimmi pisortaq tunuartoq qaammatinut 18-inut naapertuuttunik utoqqalinersiassat ilanngullugit tunuareernerminit aningaasarsiaqartinneqassaaq.

Kim Kielsenip paragraf 37 naapertorlugu apeqqummut akissuteqarnermini ilanngullugu aamma nassuiaatigaa Naalakkersuisut tunuartoq pillugu avammut nalunaaruteqarsimanngitsut Agathe Fontainip paragraf 37 naapertorlugu apeqquteqaateqarnerata nalaani naalakkersuisoqarfimmi pisortap tunuarneranut suliassaq ingerlanneqarmat.

Powered by Labrador CMS