paarlaaneq
Naalakkersuisoqarfimmi pisortaasup atorfimminit tunuarnera paasiuminaatsinneqarpoq
Ilaqutariinnut, naligiissitaanermut isumaginninnermullu Naalakkersuisoqarfimmi pisortaasoq Susie Marthin Kjeldsen suliunnaareernermi kingorna qaammatini 18-ni suli akissarsiaqartinneqassaaq. Nammineerluni soraarniuteqarsimannginnera tassuuna takuneqarsinnaavoq
Naalakkersuisoqarfimmi pisortaasup atorfimminit tunuarnerani qaammatini tulliuttuni 18-ni aningaasarsiaqartinneqaraangat paasineqartarpoq tunuartoq 'nammineerluni tunuarnissani kissaatigisimanngikkaa'.
Naalakkersuisut aamma Danmarks Jurist- og Økonomforbund-ip akornanni isumaqatigiissummi 16. december 2013-imeersumit Naalakkersuisunut siulittaasup Kim Kielsenip Inuit Ataqatigiinnit Agathe Fontainip paragraf 37 naapertorlugu apeqquteqaataani innersuussivoq.
Kim Kielsen allappoq, Naalakkersuisoqarfimmi pisortaq soraarnerminut atatillugu, Namminersorlutik Oqartussani aamma kommunini allaffeqarfinni pisortanut sulisartunut isumaqatigiissutit malillugit atorfeqartunut aningaasarsianut atorfininnermilu atugassarititaasut pillugit Naalakkersuisut aamma Danmarks Jurist- og Økonomforbund-ip akornanni isumaqatigiissummi16. december 2013-imeersumi immikkoortumut 16-imut naapertuuttumik qaammatini 18-ini aningaasarsiat pensionisiat ilanngullugit annertoqqataannik aningaasanik tunineqassaaq. Tassunga ilanngutissaaq naalakkersuisoqarfimmi pisortap sulinngiffeqartarneq pillugu inatsit naapertorlugu sulinngiffeqarnissaq suli atorsimanngisaaaammalu nuunnermi soraarnermut atatillugu aningaasartuutaasimasinnaasut.
Ilaqutariinnermut, naligiissitaanermut, isumaginninnermullu naalakkersuisoq Martha Lund Olsen, Siumut, aamma Naalakkersuisoqarfimmi pisortaasoq Susie Marthin Kjeldsen akornanni susoqarsimanersoq apeqqutaaginnalerpoq.
Naalakkersuisoqarfiup pisortaata atorfimminit ingerlaannartumik tunuartariaqalernera qanoq tunngaveqarpa? Tamanna pillugu Martha Lund Olsen aamma Susie Marthin Kjeldsen oqaaseqartinneqarsinnaanngikkallarput.
Taamaakkaluartorli innuttaasut tassa tunuartup aningaasarsiassai akilerneqassapput 1 million koruunit qaangerlugit.
Hardenbergimut suliaq aamma oqaaseqarfigineqanngitsoq
Naalakkersuisut siulittaasuat Kim Kielsen Siumumeersoq tusagassiuutinut nalunaarummi naatsumik februaarip 24-ani allappoq Naalakkersuisut Siulittaasuata Nalaakkersuisoqarfiani Naalakkersuisoqarfiup pisortaa Svend Hardenberg atorfimminit tunuartinneqarallartoq.
Naalakkersuisut siulittaasuat aamma allappoq 'suliaq inunnut ataasiakkaanut tunngassuteqarmat, Naalakkersuisut Siulittaasuata Naalakkersuisoqarfia annertunerusumik oqaaseqarsinnaanngitsoq'. Taamaattumik suliami tassani aamma ilisimaneqanngilaq sooq Svend Hardenberg tunuartinneqarallarnersoq.