Naalakkersuisoqarfimmi pisortaaneq: Eqqunngitsumik nutaarsiassiineq avissaartuutsitsiniarneruvoq
Kalaallit Nunaata soqutigineqarnera annertusiartortillugu, ukiuni kingullerni aamma annertusiartortumik qarasaasiatigut pinerlunniarfigitinneq aammalu inuit tusagassiortuusaarlutik paasissutissanik pissarsiniartarnerat naammattoorneqartualerput maannalu aamma Naalakkersuisup Ane Lone Bagger-ip atia atornerlullugu allakkiortoqarsimavoq
– Allakkiaq taanna pinerlunnikkut pinngortinneqarsimasoq pillugu sapaatip akunnera sinnilaarlugu matuma siorna ilisimatinneqarpugut, ilimatinneqarattalu erngertumik politiinut nalunaarutiginnippugut. Nutaarsiassatut nunarsuarmi attaveqaqagiiittarfinni assigiinngitsuni siammarterneqarsimavoq uagullu peertissinnaanngilarput. Ajoraluartumik ullutsinni qarasaasiatigut ineriartupiloorfiusumi saassussinerit taamaattut ingalassimatissinnaanngilagut, tassami pinerlunniarnerit taamaattut ima ajornaatsigilersimapput assinik iluarsaassisarfik photoshop ilikkalaaginnarsimagaluaraanniluunniit pinerlulluni ajortumeerinninniartoqarsinnaavoq allakkallu ilumoorpasissut eqqunngitsulli siammarterneqarsinnaapput sukkaqisumik, pissutsit taamaattut nunatsinnut apuupput, allatullu iliorsinnaanngilavut iligisagut suleqatigullu ataavartumik attavigalugillu qanimut oqaloqatigiuartariaqarpagut, Naalakkersuisut siulittaasuata naalakkersuisoqarfiani pisortaaneq H.P Barlach Christensen aviisimut Sermitsiamut erseqqissaavoq.
Aviisi ullormut saqqummertartoq Politiken ataasinngormat saqqummiivoq salloqittaalluni naalakkersuisuneertuusaartillugu allakkiortoqarsimasoq, tassani nunanut allanut naalakkersuisup, Ane Lone Bagger-ip atia peqqarniitsorujussuarmik atornerlullugu atsiornera assilillugu naggasikkamik, ilimatsaanneqarpoq siunertarineqarsimassasoq Kalaallit Nunaata, Danmarkip aammalu USA-p issittoq pillugu suleqatigiinnerat innarlerneqassasoq avissaartuutsitsisoqassasorlu, taakkumi nunat pingasut issittoq pillugu suleqatigiinnerup annertusarneqarnissaa pillugu Washingtonimi ataatsimeeqatigiinnerit ingerlanneqaleruttorfianni naalakkersuisut pinerluffigitinnerat pivoq.
Tusagassiortuusaartartut
Taamaattorli aamma Nunatta, Danmarkip aammalu USA-p akornanni suleqatigiinneq innarlerniarlugu putusaarisut kisimik ajornartorsiutaanngillat, tassami allaat aamma inuit ikigisassaanngitsut nunani tamalaanit Namminersorlutik Oqartussanut saaffiginnittarput tusagassiortuunerarlutik, taakkulu iluatsitsiniarsarisarput Naalakkersuisuni ilaasortat ataasiakkaat oqaloqatiginiarsaralugit:
– Aamma misigisarparput inuit nunani assigiinngitsuneersut saaffiginnittartut, inuit taakku tusagassiortuunerartarput. Taamaattorli ajornartorsiut taanna peqquserlulluni allakkat ingerlaartinneqarnerannut sanilliullugu iliuuseqarfigiuminarnerulaarput, tassami paasigatsiguli tusagassiortuusaartoqartartoq, taamaalillunilu sallu atorlugu apersuiniarsarisoqartartoq, erngertumik periuseqalernikuuvugut tusagassiortuunerarluni saaffiginnittut nutaarsiassaqartitsivik attuumassuteqarfigineragaat attavigisarpagut saaffiginnittoq ilumut nutaarsiassaqartitsivimmut tassunga attuumassuteqarnersoq.
Allaaserineqartoq aviimisi Sermitsiami tamakkiisumik atuaruk. Aviisi uani pisiarineqarsinnaavoq: