Naalakkersuisoqarfik: Imeq ajoquteqanngilaq
Ilulissani eqqaavissuup maajimi aallartittumik ikuallanneranut, sapaatillu akunneri pingasut missaannik sivisutigisumik ikuallanneranut atatillugu imeq misissugassamik tigusiffigineqarmat, akissutaa takkussimavoq.
Ilulissani eqqaavissuarmi ikuallattoqareernerata kingorna tatsimit imermik imigassamut imeqarfiusumit imermik misissugassamik immikkut tigusinissaq Ilisimatusarnermut Avatangiisinullu Naalakkersuisoqarfiup aallartippaa.
Dioxin suua
Dioxin akuutissaavoq ulorianarnerpaaq inunnit pinngortinneqarsimasoq, hormoninut ajoqutaasartutut kræfteqalersitsisartutullu pasitsaanneqarsimalluni. Dioxin arriitsuaqqamik nungujartortarpoq, aamma orsumi annertusiartortaluni, taamaammallu uumasuni orsoqarluartartuni aalisakkanilu nassaassaasarluni. Dioxin ikuallaasarnikkut suliffissuaqarnermilu assigiinngitsutigut suliaqarnikkut pinngortarpoq. Pissarsiffik, Avatangiisinut Aqutsisoqarfik.
Misissukkat akissutaat siulliit juunip aqqarnata missaani tiguneqarput, taakkuli aromatiske kulbrintinik taamaallaat takutitsipput.
Akuutissamilli ulorianartumik akulimmik allamik imaqartoqarnernik aamma takutitsipput.
- Akuutissanut ataatsimoortukkaanut dioxin-inik taagorneqartunut ersiutit nassaarineqarput. Ikuallannerup malitsigisaanik mingutsitsinerup pilersimanissaa ilimanaateqarpoq, Namminersorlutik Oqartussat tusagassiorfinnut nalunaarutaanni allassimavoq.
Nunatsinni nakorsaanerup immikkut ilisimasallit nunanit allaneersut suleqatigalugit inerneri nalilersorpai. Dioxin-it annikitsuaraannaat nassaarineqarput, taakkua annertuumik peqqissutsimut ajornartorsiutaasutut isigineqarsinnaanatik. Taamaattumik naliliisoqarpoq imeq nalinginnaasumik atorneqaannarsinnaasoq, Namminersorlutik Oqartussat tusagassiorfinnut nalunaaruteqarnermi allapput.
Killigititaasussamik allassimasoqanngitsoq
Nunatsinni nakorsaaneq naapertorlugu, naluneqanngilaq dioxiit ikuallattoqarnerani pinngortarttut, assersuutigalugu eqqakkat atortussiat assigiinngitsorpassuit ikuallanneranni.
- Erngup imigassap dioxinimik qanoq annertutigisumik akoqarsinnaaneranut Kalaallit Nunaanni inatsisini killiliisoqarsimanngilaq, taamaammat nunani allani ilisimasalinnut siunnersuisussarsiorsimavunga, Nunatsinni Nakorsaaneq Henrik L. Hansen Sermitsiaq.AG-mut oqarpoq.
Qularutiginngilaali imeq dioxinimik annikitsunnguamik akoqaraluartoq imerneqarluarsinnaasoq.
- Nammineerlunga sapaatip akunnerani kingullermi Ilulissaniikkama imermik imerpunga, Nunatsinni Nakorsaaneq Henrik L. Hansen oqarpoq.