Naalakkersuisoqarfik: Bamsit akornusersornagit
Aalisarnermut piniarnermullu naalakkersuisoqarfiup takornarialerisut kaammattorpai nannunik akornusersueqqunagit, imaluunniit nannunik qimaatitsiniaasunik akornusersueqqunagit. Greenland Cruisesip Qeqertarsuatsiaannut nannut pingasut takornarniarneqarsinnaanerat neqeroorutigisimavaa.
Greenland Cruisesip Qeqertarsuatsiaannut nannunik takornariartitsinissaa immikkut maluginiarneqarpoq.
Aalisarnermut, piniarnermut nunalerinermullu naalakkersuisoqarfiup, innersuussutigaa erseqqissaassutigalugulu, malittarisassat atuuttut kiisalu nannunik ajornartorsiuteqarnermi maleruagassanik malinninnittoqassasoq. Tassa susassaqanngitsut qanillissanngitsut.
Nanoq arnaviaq piaraalu eqqissisimatitaasut
Naalakkersuisoqarfiup erseqqissarpaa nannut Kalaallit Nunaata nunataani aalisarnikkullu oqartussaaffigisaani eqqissisimatitaasut. Nalunaarut naapertorlugu nannunik qammaaneq, ujaasineq, malersuineq allatulluunniit akornusersuinissaq inerteqqutaapput.
Aamma politiit, piniarnermik nakkutilliisut, kommunefogedit, inuilluunniit allat pisinnaatinneqartut nannunik sumiiffimmiit qimaatitsiniarlutik ungoorineranni akornusersornissaat inerteqqutaavoq.
Greenland Cruises facebookimini ilisimatitsivoq Qeqertarsuatsiaannut nannunik takornarniarneq sisamanngornermi ullaap tungaani ingerlanneqassasoq. Peqataasut Qeqertarsuatsiaannukassapput, nunaqarfimmiillu nannut takuniassallugit. Nannut nunaqarfimmiit 500 miiterisut maanna ungasissusilimmiipput.
Takornariartitsisulli nannunik qimaasitsiniaasut akornusersussanngikkaat, naalakkersuisoqarfiup kaammattuutigaa.
- Naalakkersuisoqarfiup ilaatigut nannunik takornariartitsiniartut peqqussavai nannunik qimaatitsiniartut nannullu akornusersoqqunagit.
Nannut ajornartorsiutaasut oqallisaassapput
Nannut qimaatinniarneqareeraluarlutik najugaqarfinnut uteqqittartut, nannut ajornartorsiortitsisuusut pillugit, Naalakkersuisut immikkut akuersisinnaasarput nannut toqunneqartussanngorlugit. Nanorli arnaviaq piaraqartoq nalunaarusiaq naapertorlugu eqqissisimatitaavoq.
Inatsisartut ukiakkut ataatsimiinnerminni tamannarpiaq oqaluuserissavaat. Inatsisartunummi ilaasortap, Jens Napaattuup, siunnersuutigaa Naalakkersuisunit immikkut akuersissuteqaqqaartinnani nannut najugaqarfinnut uteqqiattut aallaaneqarsinnaanissaannut nalunaarutip allanngortinneqarnissaa.