Naalakkersuisoqarfik allamik pisortartaalersoq

Namminersorlutik Oqartussat Natuk Lund Olsen Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortatut atorfinitsissimavaat. Mette Skarregaard Pedersen taamaalilluni pisortaajunnaalerpoq.

Natuk Lund Olsen Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi nutaatut pisortanngussaaq, Naalakkersuisut tusagssiorfitsigut nalunaaruteqarlutik taamatut ilisimatitsipput.

Naalakkersuisoqarfimmi pisortanngortussaq 43-nik ukioqarpoq, Namminersorlutillu Oqartussani Namminersornermut Immikkoortortaqarfimmi pisortatut 2017-imili atorfeqarsimalluni. Taamatuttaaq Nunalerineq pillugu Siunnersuisoqatigiinni siulittaasuuvoq.

Natuk Lund Olsen inuiaat kulturianni oqaluttuarisaanerannilu bacheloritut Ilisimatusarfimmi ilinniarsimavoq kiisalu antropologimi naalakkersuinikkullu oqaluttuarisaanermi kandidatitut Aarhus Universitetimi ilinniarsimalluni. Tamatuma saniatigut kalaalimerngit pillugit Ph.d-nngornialeruttorpoq. Taamatuttaaq Nunatta Katersugaasiviani Allagaateqarfianilu katersugaasivimmi pisortatut atorfeqarsimavoq, Naalakkersuisut ilisimatitsipput.

- Natuk Lund Olsenip suleqatiginissaa qilanaaraara. Pikkorissuullunilu nutaanik eqqarsartaaseqarpoq aamma suliassaqarfimmi annertuumik ilisimasaqarluni kiisalu politikkimut paasisimasaqarluni", Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund oqarpoq.

Pisortaajunnaalersumut qujassuteqartoq

Naalakkersuisup maannamut naalakkersuisoqarfimmi pisortaasoq Mette Skarregaard Pedersen suliaqarsimaneranit qujaffigaa:

- Tamatumunnga atatillugu Mette Skarregaard Pedersen naalakkersuisoqarfimmi pisortatut ukiuni kingullerni arfineq-marlunni tunniussaanut annertuunut qutsavigerusuppara. Mette suliassaqarfimmut pikkorissuuvoq, tatiginartoq Naalakkersuisoqarfimmilu pisortatut sulinermini tunniusimalluinnarsimalluni. Tamanik iluatsitsinissaanik ingerlalluarnissaanillu kissaappara, Kalistat Lund oqarpoq.

Mette Skarregaard Pedersen naalakkersuisoqarfimmi pisortatut 2017-imi Karrat Kangerluaani ajunaarnersuaqarmat Upalungaarsimanermut ataatsimiititaliap siulittaasuattut ilisimaneqalerpoq. Ataatsimiititaliaq ajunaarnersuaqarmat oqartussanik suleqateqarepoq Naalakkersuisunullu siunnersortaalluni.

Natuk Lund Olsen atorfittaaini ulloq 1. oktober 2022 aallartissaaq.

Powered by Labrador CMS