KL

DK

Naalakkersuisoqarfiit akerleriinnerat miliuunit sisamararterutaannik naleqartoq

Inuussutissarsiornermut Naalakkersuisoqarfiup Aningaasaqarnermullu Naalakkersuisoqarfiup soraarnerussutisiassanut ileqqaartussaaneq pillugu akerleriinnerat, eqqartuussissuserisut akissarsiassaannut miliuunit sisamarterutaannik naleqarsimavoq.

Thomas Munk Veirum

Inuussutissarsiornermut Naalakkersuisoq Jess Svane, soraarnerussutisiassanut ileqqaartussaaneq pillugu aaqqissuussamik Akileraartarnermut Aqutsisoqarfiup aqutsinera pillugu inatsisilerituumut januaarip qaammataani naliliisitsivoq.

Eqqartuussissuserisut DLA Piper naliliisinneqarpoq. Akiligassiissutip Sermitsiaq.AG-mit takuneqarsimasup takutippaa, akiligassaq 77.000 koruuninik nalilik Naalakkersuisoqarfimmut DLA Piperimit nassiunneqarsimasoq.

Akiligassarli aamma allanik suliaqarsimanermut attuumassuteqarpoq, DLA Piperilli akiligassiissutaani arfineq-pingasuusuni arfineq-marluk, DLA Piperip Jess Svane sinnerlugu soraarnerussutisiassanut ileqqaartussaanermik nalilersuinermini piffissamut atorsimasaanut tunngassuteqarluni.

DLA Piperip akiligassiissutaani arfineq-pingasuusuni arfineq-marluk, soraarnerussutisiassanut ileqqaartussaanermut tunngassuteqarput.

DLA Piperip Akileraartarnermut Aqutsisoqarfik inatsimmut akerliusumik iliuuseqarsimasoq inerniliuppaa. Taamatut ilungersunartumik inerniliisoqarmat, Aningaasaqarnermut Naalakkersuisoqarfik Kammeradvokatimi nutaamik misissuisoqarnissaanik inniminniisimavoq.

Tuaviuullugu suliassaq

Aningaasaqarnermut Naalakkersuisoqarfiup Kammeradvokatimut nalileqqusimavaa, Inuussutissarsiornermut Naalakkersuisoqarfik pisinnaatitaaffeqarnersoq Akileraartarnermut Aqutisoqarfiata aqutsineranik naliliisitsinissamut.

Pineqartup pingaaruteqarnera pissutigalugu nukinginnartutut suliakkiutigineqarsimavoq. Aningaasaqarnermut Naalakkersuisoqarfik januaarip qaammataata naalivinnerani naliliisitsinissamik inniminniisimavoq, suliallu naammassineqarsimasut februaarip tallimaanit qulinganilu ullulerneqarsimallutik.

Nalilersuinermi akiligassat: 188.834,40 koruunit.

Kammeradvokatip marlunnik allakkiorsimaneranut akiligassat.

Naalakkersuisoqarfiit taakku marluk taamaalillutik eqqartuussissuserisut aningaasarsiassaannut katillugit miliuunit sisamararterutaannik atuisimapput.

Sermitsiaq.AG-mit Naalakkersuisut Siulittaasuat Kim Kielsen aperineqarsimavoq, naalakkersuisoqarfiit akileraartartut akiligaannik imminnut akerleriinnerat qanoq isumaqarfigineraa pillugu.

Kielsenip erseqqissaatigaa, naalakkersuisoqarfiit tamarmik immikkut naliliisitsinissamut pisinnaatitaaffeqartut.

Læs hele sagen:

politikki inuiagatigiit
Powered by Labrador CMS