Skip to main content

Naalakkersuisoq: Aningaasat imatut atorneqarsimapput

Danmarkimit 80 millioner koruunit meeqqanut atugarliortunut atugassatut immikkoortinneqarsimasut, aqutsisoqatigiit ataatsimoorlutik aalajangiussimasaannut atorneqarsimapput. Meeqqanut Ilaqutariinnullu Naalakkersuisup aningaasat meeqqanut atugarliornerpaanut toqqaannartumik atorneqarsimannginnerarlugit isornartorsiuineq tunngavissaqannginnerarpaa.

Martha Lund Olsenip Danmarkimit meeqqanut atugarliortunut aningaasaliissutigineqarsimasut kukkusumik atorneqarsimanerarlugit isornartorsiuinera Meeqqat Ilaqutariinnullu Naalakkersuisup Paneeraq Olsenip (N) paasisinnaannginnerarpaa.

Piviusut

Kalalalit Nunaanni meeqqat inuusuttullu atugarliortut sullinneqartarnerisa qaanoq pitsanngorsaaffigineqarsinnaanera paasiniarlugu aqutsisoqatigiinnik pilersitsisoqarsimavoq. Aqutsisoqatigiinni inuttaritinneqarput Isumaginninnermut Inatsisinillu Atuutsitsinermut Naalakkersuisoqarfiusimasumit, Danmarkimi Social- og Ældreministeeriaqarfimmit, Danmarkimi Justitsministeeriaqarfimmit Kalaallillu Nunaanni kommuninit sinniisuutitat. Kommunit Qeqqata Kommuniani pisortaq Juliane Henningsen sinniisoraat.

Aqutsisoqatigiit siusissukkut iliuuseaqartarnerit pinaveersaartitsinerillu qanoq qulakkeerneqarsinnaanerannut, kommunini sullissisarnerup qanoq nukittorsarneqarsinnaaneranut, meeqqanut inuusuttunullu atugarliortunut amerlanerusunik neqerooruteqartarnissamik aamma meeqqat inuusuttullu kinguaassiuutitigut innarlerneqarsimasut inatsisitigut isumannaatsuutinneqarnerisa qanoq nukittorsarneqarsinnaanerinut inassuteqaatit 16-it 2020-mi aggustip qaammataani saqqummiuppaat. Inassuteqaatit taakku ullumikkut suliniutitut taaneqartarput.

Pissarsiffik: Meeqqanut, Inuusuttunut Ilaqutariinnullu Naalakkersuisoqarfik

Naalakkersuisup ilisimatitsissutigaa, aningaasat suliniutissatut aqutsisoqatigiit aalajangiussimasaannut atorneqarsimasut.

Kommuneqarfik Sermersuumi meeqqanut ilaqutariinnullu ingerlatsivimmi pisorttap Martha Lund Olsenip ilaatigut isornartorsiutigaa, aningaasa meeqqanut iluaqutaasussanngornagit, Isumaginninnermut Aqutsisoqarfiup annertusarneqarnissaanut aamma Paarisap Inuunerittallu ineriartorteqqinneqarnissaanut pingaarnertut atorneqarsimasut.

Suliniuteqarnermi sulisut 15-it atorfinitsinneqarsimasut

Meeqqanut, Inuusuttunut Ilaqutariinnullu Naalakkersuisup Paneeraq Olsenip Sermitsiaq.AG-mut allakkatigut akissuteqarluni ilisimatitsissutigaa, suliniummut atatillugu Isumaginnermut Aqutsisoqarfimmi sulisussanik 15-inik atorfinitsitsisoqarsimasoq.

Ilaatigut tassani pineqarput, meeqqat tarniinik ilisimasallit meeqqanik inuusuttunillu kinguaassiuutitigut innarlerneqarsimasunik katsorsaasartussat, tarnip pissusiinik ilisimasallit inersimasunik meeqqanut kinguaassiuutitigut innarliisartunik katsorsaasartussat. Sulisut taakku 15-it tamarmik suliniummut atatillugu atorfinitsinneqarsimapput.

Naalakersuisup uppernarsarpaa, aningaasat ilaat Paarisamut Inuunerittamullu atorneqarsimasut, oqaatigaali tamanna meeqqanut atugarliortunut ikiuutaasoq.

Inassuteqaatit taakku 16-it suliarineqarmata eqqarsaataasimavoq, Kalaallit Nunaanni meeqqat atugarliortut pillugit suliniutaareersut inerisarneqarnissaat, tassa suliniutissanik nutaarluinnarnik nassaarniarani suliniutaareersut ilisimaneqareersullu inerisaqqissinnaaniarlugit.

Aningaasat meeqqanut anngunneqarsimanngitsut

Martha Lund Olsenilli aalajangiussimallugu oqaatigaa, suliassaqarfimmut nammineq isummani malillugu naalakkersuisoqarfimmit allamit isumagineqartumut atornagit meeqqanut toqqaannartumik atorneqartariaqaraluartut.

- Peqqissutsimut aqutsisut Paarisamut, Inuunerittamut siusissukkullu iliuuseqarnissamut aningaasaliiissutigineqarsimasut napparsimasunik katsorsaanermut atorneqarnissaannik siusinnerusukkut aalajangersimanerat tupigisassaanngilaq. Taamaammat Peqqissutsimut Naalakkersuisup aningaasanik innuttaasunut atugarliornerpaanut aningaasaliissutaasimasunik tigusinani, suliassaqarfimmut immikkut aningaasaliisoqarnissaa sorsuutigisariaqarpaa, Martha Lund Olsen oqarpoq.

Paneeraq Olsenip Sermitsiaq.AG-mut allakkatigut akissuteqarnermini ilisimatitsissutigaa, aningaasat tigussaasunut maannakkorpiaq atorneqarsimasut, ilaatigut nunap kommuunini tamani meeqqat ornittagassaannik pilersitsinermut, meeqqanik sullissiartorlutik angalasartut nukittorsarneqarnissaannut, angajoqqaat piareersaataasumik pikkorissartinneqartarneranni MANU-mi atortussat nutaat ineriartortinneqarnerannut, nunami ilaqutariinnut sullissivinni tamani pisortat tamarmik attaveqaatissaannik pilersitsinermut, nunap kommuniini tamani meeqqat pillugit suliaqarnermi ataatsimut sullissivissamik nutaamik ineriartortitsinermut aamma inersimasut meeqqanut kinguaassiuutitigut innarliisimasut pillugit katsorsaavissamik pilersitsinermut, kiisalu kommunini sullissisut ilaqutariinnillu katsorsaasartut ilaneqarnerannut, kingullertut pineqartumi sullisisussatut ilinniartitsinissaq sullissisarnissarlu anguniarlugit, naalakkersuisoq ilisimatitsivoq.

Suliniutit nalilersorneqartartut

Tamakkua saniatigut aningaasat aamma suliniutit atuutsinneqalernerannik nalilersuinermut aamma meeqqat inuusuttullu atugarliortut qanoq atugaqarnerannik nalilersuinermut atorneqarsimapput. Nalilersuisarneq Danmarkimi Socialstyrelsimit isumagineqarnerusarpoq.

Martha Lund Olsenip aamma Naalakkersuisut ulluinnarni meeqqanik sullissisartut peqataatinneqartannginnerarlugit isornartorsiorpai.

- Isumaginninnermi ingerlatsiviit, ulloq unnuarlu paaqqinnittarfiit aamma angalasartut meeqqanik inersimasunillu kinguaassiuutitigut innarlerneqarsimasunik katsorsaanermik misilittagaqarlualereersut akornanni oqaloqatigiittoqarneq ajorpoq, Marha Lund Olsen Sermitsiaq.AG-mut oqarpoq.

Ataatsimeeqatigiinnerit arlallit ingerlanneqarsimasut

Paneeraq Olsen aamma tassunga tunngatillugu isumaqataanngilaq.

- Nunatsinni naalakkersuisoqarfiit aqutsisoqarfiillu, Danmarkimi ministeeriaqarfiit aqutsisoqarfiillu, nunatsinni kommunit, nunatsinni NGO-t inuiaqatigiinnillu suliniaqatigiiffiit peqataatinneqartarsimapput, naalakkersuisoq erseqqissaassuteqarpoq.

Aqutsisoqatigiit ilaatigut politiinik atuarfinnik, kommuninik. peqqinnissaqarfimmik, peqatigiiffinnik, ilaqutariinnut sullissivinnik, ulluunerani paaqqinnittarfinnik il.il. ataatsimeeqateqartarsimasut pillugit uppernarsaammik Sermtsiaq.AG pissarsisimavoq.

Martha Lund Olsen ataatsimiinnernut arlalinnut peqataasarsimavoq, oqaatigalugulu tusaaneqartariaqartut tusaaneqartarsimanngitsut.

- Ataatsimiinnerit peqqinnissatigut sulisunit danskillu sinniisaannik aqunneqartarsimapput. Inuit meeqqanik atugarliornerpaanik sullissisartut suliniutissatut pisariaqartinneqartut pillugt oqalliseqataanissamut periarfissinneqanngisaannarput, Martha Lund Olsen naggasiivoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER