Naalakkersuisoq uumassusilerituunngorniarfeqalinnginnera pillugu: Aningaasat amigaataapput
Nunatsinni uumassusilerituunngorniarfeqalernissaa akuerisaareerpoq, aningaasalli amigaataapput, naalakkersuisoq ilisimatitsivoq.
Nunatsinni uumassusilerituunngorniarfeqalernissaanut pisortatigoortut tamarmik inissinneqareerput, ilinniarfillu tunngaviusumik aallartinneqarsinnaavoq.
Aningaasaliissutissanilli nassaartoqarsinnaannginnera pissutigalugu periarfissaasimanngilaq.
Ilinniartitaanermut naalakkersuisoq, Peter Olsen (IA), Siumumeersumut Kuno Fenckerimut taama akissuteqarluni ilisimatitsivoq.
Aningaasaqarnikkut naleqqutinngitsumik oqimaatsorsiorneq
Peter Olsen akissummini nassuiaavoq, sakkortuumik pingaarnersiuisoqartariaqartoq, nunatsinni ilinniarfiit ilinniartumut ataatsimut akisuallaalernissaat pissutigalugu:
- Ilinniartitaaneq assersuutigalugu Danmarkimiinnaq pisinnaagaangat, amerlanertigut kissaatigineqartarpoq ilinniartitaanerup Kalaallit Nunaanni aamma neqeroorutigineqarnissaa.
- Kisiannili inuusuttortatta amerlassusaat killeqarmat, tamatuma kingunerissavaa ilinniakkani neqeroorutigisatsinni holdit milliartulernerat ajoraluartumillu atuartumut ataatsimut aningaasaqarnikkut oqimaatsorsiorneq naleqqutinngitsumik annertuallaalerluni. Taamaattumik ilinniartitaanernik nutaanik pilersitsinissamut kissaatigineqartuni sakkortuumik pingaarnersiuisoqartariaqarpoq, Peter Olsen Kuno Fenckerimut allappoq.
1 million koruunit amigaataasut
Aningaasaqarnermut tunngatillugu Ilisimatusarfik uumassusilerituutut ilinniakkamut ukiumut 8 mio. kr.-nik amerlanerusunik aningaasaliisoqartalernissaanut siornatigut qinnuteqarsimasoq, Peter Olsen ilisimatitsivoq.
Paasissutissat Naalakkersuisoqarfiup aanikuusai kingulliit naapertorlugit, uumassusilerinermi bacheloritut ilinniakkap aallartitsissutaasinnaasut ukiumut 1.050.000 kr.-nit amigaataapput. Peter Olsenip 2024-mi ilinniakkamut aningaasaliisoqarnissaa sulissutiginiarpaa.