Ineqarnermut, Attaveqatigiinermut, Aatsitassanut Naligiisitaanermullu Naalakkersuisunngortoq ullormi siullermili sulilluni aallartissimavoq. Taassumami oqartussaaffiit ukiuni kingullerni politikkerinit innuttaasunillu akerleriissutaasimaqalutik oqallisigineqarsimaqisut akisussaaffigilersimavai.

Naaja Nathanielsenip Kuannersuarni aatsitassarsiorniarnermut pilersaarutigineqartut tamanut saqqummiussinnaannginnerarpai, erseqqissaassutigaali qineqqusaarnermi suliniut unitsinneqavinnissaannik IA-p neriorsuuteqarsimanera suli atuuttoq.

- Qineqqusaarnermi nalunaarutigisimasavut attatiinnarpavut. Kuannersuarni uranimik piaasoqarnissaa akuerinngilarput, Naaja Nathanielsen Sermitsiaq.AG-mut oqarpoq.

Taassuma erseqqissaassutigaa, Kuannersuit uranitaqarmata suliniut unitsinneqassasoq. Alllat pissutigineqanngillat.

-Attanneqarsinnaasumik aaqqiissutissarsiussaagut. Uranimut naaggaarluinnarneq innuttaasunit tapersersorneqartoq oqaluuserineqarsinnaavoq. Aammali aningaasaliissuteqartartunut erseqqissaassutigissavarput, nunami maani aatsitassarsiortoqarnissaa anguniagaringipput, uranimulli politikkikkut isumaqarpugut innuttaasullu tassunga akerliullutik.

Timmisartoqarfissat erseqqissumik paasissutissiissutigineqassasut

Timmisartoqarfilianut oqallisigineqaqisunut tunngatillugit sanaartornermi aningaasaqarneq piffissami kingullermi oqaluuserineqartoq siulliullugu paasiniarneqassaaq.

- Aningaasaqarneq pillugu paasissutissanik pissarsissaagut aamma missingiunneqarsimasut sinnerlugit atuinissamik naatsorsuutigineqartut Inatsisartunut innuttaasunullu saqqummiunneqassapput, Naaja Nathanielsen oqarpoq.

Timmisartoqarfiliorniarneq Inatsisartuni oqaluuserineqarmat IA-mit siunnersuutigineqarsimavoq, sanaartornermi aningaasaqarneq ajalusuunnginniassammat timmisartoqarfiliornerit ataasiakkaarlugit ingerlanneqassasut. Naaja Nathanielsenip oqaatigaa, IA-p ernummateqarsimanera ilumoorttoq, pissutsillu tulliullugit oqaatigineqartut misissorneqartariaqartut isumaqarluni.

 -Aalajangersimanerup kinguneqaatai ammaffigisariaqarpavut. Assersuutigalugu sanaartotnermi aningaasatigut ajalusoortoqarnerata malitsigisaanik aningaasat atugassiissutigineqartut annikinnerusumik sanaartornermik kinguneqarnerat pissutigalugu sunut allanut akissaarussimanersugut, taanna oqarpoq.