Naalakkersuisoq: Siunnersuut suliarilluagaavoq

Suliareqqitassaqanngilaq! Suna tamarmi misissorneqareerpoq. Ajortoqassagaluarpallu misissorusupparput.

Aningaasaqarnermut naalakkersuisup, Randi Vestergaard Evaldsenip (D), suliffeqarfinni kattufferujussuit tallimat soraarnerussutisiat pillugit aaqqissuusseqqinnermi tuaviuussinermut aarlerisaaruteqarnerannut oqaaseqaataa allatut oqaatigalugu taama nipeqarpoq.

Kattuffiit tallimat
Kattuffiit taakku tallimat tassaapput: Ilinniartitsisut kattuffiat IMAK, Peqqissaasut Kattuffiat, Nunatsinni Perorsaasut Kattuffiat, Atorfillit Kattuffiat kiisalu Sulisitsisut.

Kattuffiit Inatsisartunut aamma Naalakkersuisunut ammasumik allagaqarnerminni aarlerisaarutigaat, politikerit soraarnerussutisiaqarnissamut aaqqissuussinermut Danmarkimiittunut/nunani allaniittunut akiliutit akileraaruserneqarnissaasa siuartinnissaat, inatsisip kingunissai suli sukumiisumik qulaajarneqartinnagit akuersilersut.

Inatsisissatut siunnersuummi pineqarput Kalaallit Nunaanni akileraarutissanut ilanngaammik atuisut, soraarninngortussanngorlutilli allamut nuuttut, taavalu soraarnerussutissaqarnissamut namminneq ileqqaakkaminnik tigusinerminni Danmarkimi imaluunniit nunami allami akileraartartut.

Misissoqqissaarneqassasut
Kattuffiit tikkuartorpaat, apeqqutinik arlalinnik inatsisissatut siunnersuummi akineqanngitsunik apeqquteqarsimallutik. Taakkulu siunnersuutigaat, Namminersorlutik Oqartussani, soraarnerussutisiassanut aningaasaateqarfinni, aningaaserivinni kattuffinnilu immikkut ilisimasalinnit peqataaffigineqartumik, suligasuartussamik ataatsimoorussamik piaartumik suleqatigiissitaliornissaq.

Taakku suliassarissavaat pissutsit suli misissorneqarsimanngitsut misissoqqissaarneqarnissaat.

Isumaqataanngitsoq
Naalakkersuisorli Randi Vestergaard Evaldsen misissugassaqarneranik isumaqanngilaq. Assersuutigalugu inatsisissamut siunnersuummut suliarinninnermi.

- Soraarnerussutisiat akileraarusersornerannik allannguuteqarnissaq pillugu siunnersuut siullermik Akileraartarnermut Atugarissaarnermullu Ataatsimiititaliap 2011-mi saqqummiuppaa, siunnersuummik saqqummiussineq sioqqullugu siunnersuummik tapersiisunik arlalippassuarnik naatsorsueqqaarluni.

- Tassannga aalaakkaasumik aallaaveqarlutik Naalakkersuisuusimasut maannakkullu atuuttut siunnersuut kattuffiit aamma soraarnerussutisiassanut aningaasaateqarfiit qanimut oqaloqatigalugit suliaqarfigeqqissimavaat, tassuunarpiakkut naapertuussinnaanngitsut tamarmik iluarsiivigisimanissaat qulakkeerniarlugit, Randi Vestergaard Evaldsen kattuffinnut akissuteqarnermini naqissusiivoq.

Suliarilluagaq
Taassuma saniatigut tikkuarpaa, aaqqiissutissatut siunnersuummi arlalinnik iluarsiisoqarsimasoq.

- Siunnersuummilu ilimagisamit naapertuutinngitsoqassappat, taava Naalakkersuisut misissuinissaminnut piareersimapput. Inatsisissatut siunnersuut suliarilluagaasoq Naalakkersuisut isumaqarput, ullorlu manna tikillugu inatsisissatut siunnersuummut annertuumik pingaarutilinnik piviusunik amigaatinik arlaannaalluunniit taakkartuisinnaasimanngilaq, Randi Vestergaard Evaldsen ilanngullugu oqarpoq.

Taassumalu aamma kattuffiit kaammattorpai, apeqqutit akineqarsimanngitsut nassiuteqqinnissaat.

- Taamaalilluni immikkut ilisimasallit sioqqutsisumik suliaasa saniatigut kattuffiit ataasiakkaarlugit ataatsimoortillugillu atorfilittat inissisimaffiisigut arlalippassuarnik ataatsimiittoqartarsimavoq. Tamanna patsisigalugu Kalaallit Nunaanni soraarnerussutisiassanut aningaasat isertitat Kalaallit Nunaanni akileraaruserniarnissaasa qularnaarnissaannut isumaliutissiisussamik ataatsimiititalimik imaluunniit immikkut ilisimasallit suleqatigiinnik suli ataatsimik pilersitsinissamut piviusumik pisariaqartitsisoqassasoq isumaqanngilanga. Siunnersuut taanna pillugu oqaluuserinninnerput naammaleqaaq – maannakkut iliuuseqartariaqalerpugut, Randi Vestergaard Evaldsen oqarpoq.