Royal Arctic Line
Naalakkersuisoq RAL-imi suliamut akuliuttoq
Royal Arctic Line-p pisortaanera Verner Hammeken, sisamanngornermi Sermitsiaq.AG-p avammut niueruteqartarneq pillugu isornartorsiuneranut nassuiaateqaqqullugu Attaveqatigiinnermut Naalakkersuisumut Erik Jensenimut aggersagaavoq.
Royal Arctic Line-p suliassaminik naammassinnissimannginnera pissutigalugu qaammatini kingullerni Heca Nuuk aningaasarpassuarnik annaasaqarpoq.
Juleøl-it uninngaannartut
Novembarip qaammataani suliffeqarfiup juleøl-it 250.000 koruuninik nalilillit islandimi niuerfinnut nassiuppai. Novembarip naanerani immiaaqqat tikereersimasussaangaluarput, umiarsuaatileqatigiiffiulli tukattumik suleriaaseqarnerata kingunerisaanik, immiiaaqqat tuusintilikkuutaat aatsaat decembarip ulluisa 22-ni apuuffissaminnut apuunneqarput. Immiaaqqat massakkut Islandimi toqqorsivimmi uninngaannarput.
Maqitsivimmi sullissisoq ungasinngitsukkut nalunaarfigineqarpoq, Islandimi Reykjavikimut nassiussat nutaat pilersaarut malillugu januaarip ulluisa 21-ni tikiunneqarsinnaanngitsut, aatsaalli februaarip aqqarnanni tikiunneqarsinnaasut. Tamannalu maqitsiviup pisortaanerata Nicolai Nissenip februaarip qaammataata aallartilaarnerani aaqqissuussaq annertooq ingerlaannartumik taamaatittariaqarsimavaa. Aaqqissuussineq Kalaallit Nunaannut ukkatarinnittoq, politikerinit, aallartitanit suliffeqarfinnillu peqataaffigineqartussaasimangaluarpoq.
Aamma atuaruk: RAL-ip tikinnissat pilersaarusioqqaaratik taamaatittarpai
Taama atugassaqartitaalluni avammut niueruteqartoqarsinnaanngitsoq, Nicolai Nissenip oqariartuutigaa. Taamaammat politikkikkut iliuuseqartoqarnissaa taassuma kaammattuutigaa.
Ilungersuumminartoq
Oqaluuserineqarnerata kingunerisaanik assartuinermut politikkikkut oqartussaasoq sunnerneqarsimavoq.
- Suliaq ilungersuumminartutut isigaara, taamaattoq Royal Arctic Line-miit paasitinneqanngikkuma oqaaseqassanngilanga, Attaveqatigiinnermut Naalakkersuisoq Erik Jensen Sermitsiaq.AG-mut oqarpoq.
Oktobarip qaammataani Verner Hammekeni umiarsuaatileqatigiiffiup 2017-imi upernaakkulli ajornartorsiutai pillugit
Erik Jensenimut nassuiaateqartariaqarsimavoq, tamanna nunatsinni inuussutissarsiuutilinnut millionilikkuutaanik naleqarsimavoq.
Aamma atuaruk: Avammut niuernissamik takorluukkat Royal Arctic Linep unitsilerpai
Taamani Erik Jensen Sermitsiaq.AG-mut ima oqarpoq:
- Umiarsuaatileqatigiiffik atuisuminit tatigineqarnerminik aaqqissuteqarnissaa pingaaruteqarpoq, Erik Jensen erseqqissaavoq. Naatsorsuutigisimavaalu ukioq naatinnagu umiarsuaatileqatigiiffik ajornartorsiutigisaminik aaqqiissuteqareersimassasoq.