Naalakkersuisoq: Nathanielsen paasisinnaavara

Nunatsinni atuarfinnut akisussaasuunerpaaq, Nivi Olsen (D), inuit ilaasa atuarfik namminersortoq pisortat atuarfiutaannut taarsiullugu toqqaasarnerannut paasinnilluinnarpoq.

Sermitsiaq.AG-mut ullumi taanna taama oqarpoq.

Ernumassuteqaqataasoq
- Naaja Nathanielsenip ernumassuteqarnera Naalakkersuisut taperserluinnarpaat. Ernumassutsit uanga, aamma allarpassuit ilisimasaat, arlaleriarlutillu oqaatigineqartartut, ilinniartitaanermut naalakkersuisoq , Ilulissani atuarfik pillugu seminareqarnerani ammaanersiornermi oqalugiaamminut innersuussilluni oqarpoq.

Taassuma nassuerutigaa, meerarpassuit atuartut unammillernartumik aalajaatsumik ilinniartinneqarpiarneq ajortut.

Unammilligassanik amigaateqartut
- Ullumikkut meeqqat amerlavallaat sumiginnarpagut - meeqqat angerlarsimaffimminni tamakkiisumik tapersersorneqanngitsut ajornakusoortumik inuuniarnermik pissuteqartut, kisianni aamma ilaqutariit ingerlalluartut, soorlu assersuutigalugu atuarnerminni unammilligassanik pisariaqartitsisut.

Uani sapaatip-akunnerani AG-imi saqqummertumi atuartartut allagaqarluni illuattungiliuttut Naaja Nathanielsenertaat (IA), uggornaraluartumik meeqqani marluk Nuummi atuarfimmut namminersortumut nuutsinniarlugit aalajangerluni nalunaarutigaa.

Isummanut tunngavigisanut ajornartorsiut
- Ilorpianni misigisimavunga meeqqat allat ilinniartitsisullu sumiginnarlugit meeqqama ataatsimoornermit anisinnerisigut. Misigisimavunga inoqatinnik soqutigittaatsumik iliorsimallunga. Killissarali tikissimavara. Isummersoriaasera naapertorlugu illersorsinnaajunnaarpara takusinnaallugu meeqqakka atugarliortinneqartut, taanna AG-imi uani sapaatip akunnerani saqqummertumi atuartartut allappoq.

Atuaruk: Naajap pisortat atuarfiutaat taamaatiinnarpaa

- Avataaniit isigalugu atuarfeqarneq tamarmi qasusoorsimasutut isikkoqarpoq. Allaanngilaq ilinniartitsisut aqutsisuisalu amerlanersaat qatserinermik suliaqartartut, suliassanullu nuannersunut pissarsinartunullu piffissaqaratillu nukissaqaratik, meeqqat atuarfiat pillugu taanna oqaaseqarpoq.

Aqutsineq nukilaatsoq
Nivi Olsenip maannakkuugallartoq akissutituaa tassaavoq, kommunit maanna atuarfiit ingerlanneqarneri atuartitsinermik pitsaanerulersitsinissaq siunertaralugut aallartissasut.

- Kommuni atuarfinni ataasiakkaani ineriartortsitsinermi kommunimi qinikkat siuttuussapput, politikkiisa, anguniagaasa aamma iliuuseqarfiisa malinneqarnerannik qulakkeerinnittuullutik. Atuarfinnik ingerlatsisoqarfiit aqutsinermut aamma perorsaanermut nukissat pigigunikkit taamaallaat anguneqarsinnaapput, naalakkersuisoq nassuerpoq.

Immaqa angajoqqaat siunnersuisooqatigiit pilersinneqassasut
Taassuma ilanngullugu oqaatigaa, atuartut atuarnerannut angajoqqaat annertuumik sunniuteqaqataasut. Neriuutigaalu angajoqqaat peqataatinneqarnerat aamma atuarfimmi sunneeqataanerat annertusineqarsinnaasoq.

Atuaruk: Kommune Kujallermi meeqqat atuarfiisa inatsit unioqqutippaat

Atuaruk: Kommune Kujalliup atuarfiit ukkatariniarpaat

- Angajoqqaanulluunniit ataatsimiititaliamik pilersitsinikkut, atuarfiit ineriartortinneqarneranut ilungersuutinut angajoqqaat oqariartuuteqartarfissaat, taanna oqarpoq.

Atuarfiit malinnaaffiginiarai
Taassuma saniatigut Nivi Olsenip neriuutigaa, Inerisaaviup 'angerlaanneqarnera' aamma namminersorlutik oqartussani Ilinniartitaanermut aqutsisoqarfimmik pilersitsinikkut atuarfiit ineriartortinneqarsinnaasut.

Atuarfiit aqutsisuisa pitsaassusaat appasippallaarpoq, Olsen siornatigut taama naammagittaalliuteqarnikuuvoq, maannakkullu arlalinnik kivitseqqinnernik suliaqarnikkut aqutsisut ineriartortissinnaallugit neriuutigaa, Sermitsiaq.AG-mut nassuiaavoq.

Nalilersuisoqalersoq
Taassuma saniatigut Nivi Olsenip, ilinniartitsisunngorniarfiup nalilersorneqarnerata ingerlanneqartup naammassineqarpat paasisaqarnerussalluni neriuutigaa.

Atuaruk: Naajap pisortat atuarfiutaat taamaatiinnarpaa

Naaja Nathanielsenip ilanngussaa tamaat aamma aalajangerneranut qisuariaatit AG normu 9-mi atuaruk. Aviisi pisiniarfimmi imaluunniit uani ataani pisiarisinnaavat.

Meeqqat atuarfiisa pitsaassusaat pillugu oqallinnermut ilanngunnissannut aamma tikilluaqqusaavutit. Allaaserisap ataani oqaaseqartarfik atoruk. Aammalu tallimanngorpat marsip sisamaani nalunaaqutaq 10.00 - 12.00, Naaja Nathanielsen Sermitsiaq.AG-mi allaqatiginissaanut tikilluaqqusaavutit.