OL 2014
Naalakkersuisoq: Martin Møller angusarissaarluaqaaq
- Martin Møller ujakkaartartuni pikkorinnerpaavoq sisorartartunngortussanullu maligassiuisunngortillugu, kultureqarnermut naalakkersuisoq Nick Nielsen oqarpoq
- Martin Møllerip ukiuunerani OL-eqarnermi peqataanera angusaalu assorsuaq pitsaapput.
Ilinniartitaanermut, ilageeqarnermut, kultureqarnermut naligiissitaanermullu Naalakkersuisoq Nick Nielsen Siumut oqarpoq, taanna ukiuunerani Sochimi OL-eqarnermi Martin Møllerip 50 kilometerimut oqilaniuteqataanerani malinnaavoq.
- Martin Møllerip nunarsuarmi sisoraatinik ujakkaartartunut nukittunerpaanut unamminera malinnaaffigalugu namminerlu takullugu qanoq sisoqqaritsiginersoq qanorlu pikkorinnerpaarpaanut malinnaalluartigisinnaanersoq assut pisanganarpoq. Aamma immikkuullarilluinnartumik akiuukkumatussuseqarnera takullugu nuanneqaaq. Aallaqqaarnerminiilli akiuutilerpoq nikallujuilluinnarlunilu apuuffissamut apuunnissami tungaanut akiuulluni, 5 minutsinik russenit OL-imi ajugaasunit nukittoorsuarnit kingulliulaatsiaannarluni. Isumaqarpunga akiuukkumatussutsip taassuma nunatsinni sisoraatinik ujakkaartartuni pikkorinnerpaanngorsimaneranut peqqutaasoq sisorartartunngortussanullu maligassiuisunngortillugu, tusagassiutinut nalunaarummi Nick Nielsen oqarpoq.
Nangipporlu:
- Nunarsuarmi ujakkaartartut nuimanerit pikkorinnerpaanik sungiusaasoqarlutillu ikiorteqartut Martin Nuup eqqaani nunakkut arpattoq sisorarfinniluunniit sungiusartoq naammattoorneqarsinnaasarpoq. Martinnip OL-imi peqataanera angusaasoq immikkuullarilluinnartoq tamassuma ersarissisippaa angusarlu nunatsinni timersortartunut timersortalerumaartunullu annertuumik maligassiuisuuvoq.
Nick Nielsen kingumut qiviarpoq:
- Aasianni ilinniarnertuunngorniartillunga Martin Møller Aasianni sisorartoq takusarnikuuvara kinalu taamani isumaliorpa OL-imut taamaalluni peqataajumaartoq. Martinnip angusai assorsuaq pikkugaakka inuillu Aasianni ASP-miittut nunarsuarmiittullu allat Martinnimut sungiusaallutillu tapersersuilluarsimasut ataqqillugit oqarfigerusuppakka.
Martin Møllerip Nuummut tikinnera pillugu Sermitsiaq.AG-mitullup ingerlanerani saqqummiussiumaarpoq